GÉÉN SEËN BUITE CHRISTUS NIE

Die heil en verlossing, identiteit en bestemming van alle nasies en alle mense is slegs in Jesus.  Daar is geen verlossing, geen vrede, geen ware blydskap of vervulling buite Hom nie.  Ons boodskap as dissipels van Jesus is nie dat mense deur ‘n soort van ‘n algemene geloof in die Bybel geseën kan word as onafhanklike individue of families nie.  Dit is eerder dat hulle slegs IN CHRISTUS geseën kan word deur vergifnis, heil, verlossing en identiteit IN HOM te vind!  Net so is jou verdere pad na versoening met Jesus nie ‘n onafhanklike bestaan waar jy probeer om op ‘n manier seën vir jou eie lewe, omstandighede en familie by God te kry nie.  Jou seën kan net gevind word in ‘n groeiende en lewende kennis van Jesus en jou vereniging met Hom.  

“Maar julle moet toeneem in die genade en kennis van onse Here en Saligmaker, Jesus Christus. Aan Hom kom die heerlikheid toe, nou sowel as in die dag van die ewigheid. Amen.”  2 Pet. 3:18  

Dit is nie nodig vir jou om lang ompaaie in ‘n geestelike woestyn te stap deur iewers hierdie ontwykende geseënde lewe te soek nie.  Fokus liewer jou hele hart op Jesus en verhouding met Hom en selfs al lyk jou lewe dan uiterlik asof alles nie altyd klopdisselboom is nie, sal jy in jou binneste weet dat jy weet dat jy ‘n geseënde mens is, ryk in genade!

VERVANG JOU FRUSTRASIE MET JESUS SE PRESTASIE!

Gehoorsaamheid is ‘n uiters belangrike deel van ons lewe as dissipels van Jesus, maar ‘n verkeerde verstaan van gehoorsaamheid bring nie ‘n seën nie, maar groot frustrasie.  Paulus som vir ons gehoorsaamheid onder die Ou Verbond op in Romeine 10 vers 5 met die aanhaling: “Die mens wat hierdie dinge doen, sal daardeur lewe.”   Vroeër in Romeine sê Paulus dit is Jesus se gehoorsaamheid wat regverdig maak (Rom. 5:19).  Die klem lê in die Nuwe Testament op Jesus se gehoorsaamheid en ons geloof.  Dit is juis ons geloof in Sý gehoorsaamheid wat die krag is van ons gehoorsaamheid.  Daarom kry ons die term “geloofsgehoorsaamheid” in die Nuwe Testament (Rom. 1:5). Gehoorsaamheid in die Nuwe Verbond is ‘n reaksie op die Vader se evangelie-aksie in Christus.  Is jy gefrustreerd met jou onvermoë om ‘n gehoorsame lewe te lei?  Gaan weer terug na die Nuwe Testament en begin lees dit met die klem op Jesus se prestasie en nie in die eerste plek jou verantwoordelikheid nie.  Maak seker dat Jesus se prestasie (sy verlossingswerk) jou meer beïndruk as enigiets anders in die Bybel en jou hele uitkyk op gehoorsaamheid sal radikaal verander.  Gewaarborg!  Die hele Ou Testament bou op na Jesus se gehoorsaamheid en prestasie.  Ons gehoorsaam nie om regverdiging en lewe van God te ontvang nie.  Ons gehoorsaam ómdat ons regverdiging en lewe in Jesus ontvang het!

ORE OM TE HOOR

By verre die grootste deel van dissipels van Jesus se verantwoordelikheid is om seker te maak dat ons onverdeelde aandag skenk aan wat God vir ons wil sê.  Ons aandag word deur so baie dinge afgelei en ons ore is oop vir soveel goed wat nie ewigheidswaarde het nie.  Die herstel en genesing van ‘n lewe voor God begin áltyd met “nuwe ore” om te kan hoor wat God vir ons wil oordra in Sy Woord.  Verder is die behoud van ‘n oorwinningslewe 100% afhanklik van my heilige vasberadenheid om aan te hou hoor én luister.  Net die wat “hoor” kan verstaan en net die wat verstaan kan oorwin deur die krag wat God verleen deur Sy ewige Woord.  

“En Hy het die skare na Hom geroep en vir hulle gesê: Luister en verstaan!”  Matt. 15:10  

Gehoorsaamheid begin áltyd met “luister”, want die krag om te kan gehoorsaam word net ontsluit wanneer die woorde van God ‘n vastrapplek gekry het in my hart.  Kyk bietjie na hierdie klein uittreksel van tekste uit die Ou en Nuwe Testament wat ‘n appél maak op ons om te hoor en te luister.  Neem jou konkordansie en soek nog tekste wat dieselfde appél maak.  Jy sal verbaas wees om te sien hoe dit soos ‘n goue draad regdeur die Bybel loop.

“Waarom weeg julle geld af vir wat geen brood is nie, en julle arbeid vir wat nie kan versadig nie? Luister aandagtig na My en eet die goeie, en laat julle siel hom in vettigheid verlustig.”  Jes. 55:2  

“Neig julle oor en kom na My toe, luister, en julle siel sal lewe; Ek wil met julle ‘n ewige verbond sluit: die bestendige genadebewyse van Dawid.”  Jes. 55:3  

“Maar Jeremia antwoord: Hulle sal u nie oorgee nie. Luister tog na die stem van die HERE in wat ek aan u sê; dan sal dit goed met u gaan en u siel sal lewe.“  Jer 38:20  

“En elke siel wat nie na dié Profeet luister nie, sal uit die volk uitgeroei word.”  Hand. 3:23  

 “Wie ‘n oor het, laat hom hoor wat die Gees aan die gemeentes sê. Aan hom wat oorwin, sal Ek gee om te eet van die boom van die lewe wat binne in die paradys van God is.”  Openb. 2:7 

DIE LIEFDE WAT GEHOORSAAM

Jesus het na die aarde gekom om te "soek en te red wat verlore was". Ons verlorenheid het ten diepste te doen met 'n ongehoorsame hart. Daarom is ons redding baie meer as net vergifnis van sondes, maar juis ook 'n nuwe gehoorsaamheid deur die wedergeboorte. Die ware toets is dus nie net my belydenis dat ek Hom liefhet nie, maar my lojaliteit aan sy Woord. Bybelse liefde vir Jesus lei altyd tot 'n begeerte om Sy wil te doen. Ek het Jesus lief, ek het sy Woord lief. Hierdie twee loop altyd saam in die Skrifte. Pasop vir boodskappe wat hulle op allerhande subtiele maniere (of blatant!) skei van mekaar.

"Jesus antwoord en sê vir hom: As iemand My liefhet, sal hy my woord bewaar, en my Vader sal hom liefhê, en Ons sal na hom toe kom en by hom woning maak. Hy wat My nie liefhet nie, bewaar my woorde nie; en die woord wat julle hoor, is nie myne nie, maar is van die Vader wat My gestuur het." Johannes 14:23-24

DIE BESTE VERTALING VAN DIE BYBEL

Die beste vertaling van die Bybel is die een wat die Heilige Gees in jou hart (en dan in jou lewe) vertaal wanneer jy die kruis van Christus omhels as jou eie.  Net so word God se liefde sigbaar in jou.  Dit is ook die enigste vertaling wat ongelowiges kan lees…wanneer hulle die Bybel “vertaal” sien in jou lewe!

“So werk die dood dan in ons, maar die lewe in julle.”  2 Korinthiërs 4:12  

“Soos geskrywe is: Om U ontwil word ons die hele dag gedood, ons is gereken as slagskape.” Romeine 8:36