IS DIE GROOT DRIE IN JOU HART?

 "En nou bly geloof, hoop, liefde — hierdie drie...."  1 Korinthiiërs 13:13

Regdeur die Nuwe Testament praat Jesus en die apostels op verskillende maniere van geloof, hoop en liefde; dikwels van geloof en liefde wat saamwerk in die dissipel se lewe en soms van al drie saam. In Kolossense 1 leer Paulus ons dat die drie onlosmaaklik aan mekaar verbind is en dat al drie geanker is in Jesus. 

"Omdat ons gehoor het van julle geloof in Christus Jesus en julle liefde tot al die heiliges, vanweë die hoop wat vir julle weggelê is in die hemele, waarvan julle vroeër gehoor het deur die woord van die waarheid van die evangelie." Kolossense 1:4-5

Ons kan hierdie drieling van die Nuwe Testament die groot drie in die dissipel se lewe noem.  As 'n mens wil toets of jou belydenis van Jesus eg is, hoef jy nie veel verder te soek as hierdie drie kwaliteite nie.  Is hulle teenwoordig in jou hart en lewe?

Ware dissipels van Jesus se geloof rus ten volle in wie Jesus is en wat Hy vir ons gedoen het aan die kruis. Hulle vertrou nie in die mens of in hulle eie krag en wysheid nie. Hulle geloof vind tweedens uitdrukking in liefde vir ander gelowiges. Jy hoef hulle nie te probeer oortuig dat liefde altyd saam met ware geloof stap nie. Laastens is hierdie geloof en liefde van die ware dissipel geanker in die sekere wete dat Jesus opgestaan het uit die dood en dat daar daarom ook vir ons 'n heerlike opstanding beskore is. Hierdie drie geestelike kwaliteite ontvang ons as't ware in saadvorm by die wedergeboorte en soos wat ons geestelik groei word hulle al hoe sterker in ons hart. Dit is belangrik dat ek sal groei in geloof, hoop en liefde, maar eers moet ek seker maak dat die groot drie wel, in watter mate ookal, in my hart teenwoordig is. Net so kan ek weet dat Christus werklik in my woon (2 Kor. 13:5).

GENADE EN WAARHEID LOOP SAAM

"En die Woord het vlees geword en het onder ons gewoon — en ons het sy heerlikheid aanskou, 'n heerlikheid soos van die Eniggeborene wat van die Vader kom — vol van genade en waarheid." Johannes 1:14

Die genade van God in Christus steek niks weg nie. Dit verdoesel nie sonde nie.  Dit smeer dit nie toe of vee dit onder die mat in nie. Ons sien dit baie duidelik in Jesus se bediening.

Jesus het nooit genade bedien as 'n groot "cover up", soos wat vandag in so baie kringe gedoen word  nie.  Jesus het presies geweet wat in elke mens se hart aangaan.  Niemand kon enigiets vir Hom wegsteek nie. Neem die vrou by die put in Johannes 4 as voorbeeld.  Hy het elke persoon wat Hy mee gewerk het deur die Gees onder oortuiging gebring van die waarheid van wat werklik in hulle hart aangaan en dan het Hy hulle gelei na verlossing. Verlossing vir die wat bereid was om saam te stem met Jesus se diagnose van hulle hart. Dit is verstommend en terselfdertyd verlossend om te sien hoe konsekwent Jesus met almal was wat oor Sy pad gekom het. Hy is vandag nog net so konsekwent. Hy laat niemand wegkom met self-bedrog nie. Hy wys vir jou die waarheid van jou verlorenheid en jou behoefte aan genade en dan voorsien Hy daardie genade!

Ons moet nooit genade en waarheid teenoor mekaar stel nie. Hulle loop saam en is niks anders nie as die persoonlike bediening van Jesus. Vat albei se hande en hulle (Hy) sal jou lei na lewe, vryheid, vrede, vreugde, en hoop.

WIE SE HUIS BOU JY OP HIERDIE AARDE?

"So spreek die HERE van die leërskare: Hierdie volk sê: Nog het die tyd nie gekom, die tyd dat die huis van die HERE gebou moet word nie.  So het die woord van die HERE dan gekom deur die diens van die profeet Haggai en gesê:  Is dit vir julle self wel tyd om in julle betimmerde huise te woon, terwyl hierdie huis in puin lê?" Haggai 1:2-4 

In 'n sin is hierdie woorde van Haggai verteenwoordigend van alles wat die profete in die Ou Testament en die apostels van die Nuwe Testament aan God se mense wou oordra.  God se plan is om op hierdie aarde Sy heerlikheid bekend te maak deur Sy mense, wat Sy huis en tempel is. God bou vandag mense se lewens tot Sy heerlikheid.

"So is julle dan nie meer vreemdelinge en bywoners nie, maar medeburgers van die heiliges en huisgenote van God,  gebou op die fondament van die apostels en profete, terwyl Jesus Christus self die hoeksteen is,  in wie die hele gebou, goed saamgevoeg, verrys tot ‘n heilige tempel in die Here,  in wie julle ook saam opgebou word tot ‘n woning van God in die Gees." Efes. 2:19-22 

God bou ons op as Sy huis en tempel deur ons bedieninge aan mekaar  in eenheid en liefde (Efes. 4:1-16).  Dit beteken egter dat ons eerstens 'n diepe besorgdheid moet hê vir die opbou van God se huis en dat ons tweedens beskikbaar moet wees vir hierdie bouwerk met die gawes en bedieninge wat God ons gegee het.  Is dit nie die boodskap van die Bybel nie? 

Maar wat sien ons vandag?  Die boodskap is totaal verdraai en vervorm.  Nou gaan dit oor die Here wat bestaan om my huis te bou, in plaas van ek wat bestaan om Sy huis te bou!  Nie net roep ons mense nie op om hulle tyd en gawes te gee vir die bou van God se huis nie, maar ons gaan verder en leer hulle dat God eintlik net besorg is daaroor om húlle huise te bou en te seën.  Dit is verkeerde kant om.  Hier is God se orde.

"Maar soek eers die koninkryk van God en sy geregtigheid, en al hierdie dinge sal vir julle bygevoeg word." Matt. 6:33 

God se oordeel rus op daardie verdraaide boodskap. Waar staan ek en jy?  Oor wie se huis is ons besorgd? 

DIE HOOFDOEL VAN DIE BYBEL

"Teenoor Grieke sowel as nie Grieke, teenoor wyse sowel as onverstandige mense is ek ‘n skuldenaar. Vandaar die verlange van my kant om ook aan julle wat in Rome is, die evangelie te verkondig." Romeine 1:14-15

"Die liefde van Christus dring ons, omdat ons tot die insig gekom het dat een vir almal gesterwe het, en dit beteken dat almal gesterwe het." 2 Korinthiërs 5:14

Die profete in die Ou Testament het nie openbaringe by God ontvang om dit net vir hulleself te hou nie.  Dit was altyd openbaring wat bedoel was om by mense uit te kom.  Dit is ook niks anders in die Nuwe Testament met ware dissipels van Jesus nie.  In ons geval is dit natuurlik net die insig wat die Gees ons gee van dit wat reeds deur die profete en apostels neergepen is.

Die Heilige Gees ontsluit vir ons die Bybel en openbaar Christus om ons in die teenwoordigheid van die Vader te bring, maar dit is 'n besonderse kenmerk van die bediening van die Gees dat Hy altyd saam met die ontsluiting van die Bybel 'n dringendheid in ons plaas om dit te deel met mense. As jy jouself bevind op 'n plek waar die Bybel vir jou 'n boek geword het wat jou net intellektueel fassineer en besig hou of skietgoed gee om teologiese debatte te wen, het jy dringend nodig om te erken dat jy kontak verloor het met die hoofdoel van die Bybel.  Die Heilige Gees sal ons altyd eers by self-ondersoek bring deur die openbaring van Christus, sodoende in die teenwoordigheid van die Vader bring, en dan vir ons 'n dringendheid in ons binneste gee om ménse te bedien.

Vir seker is die Skrif ook bedoel om ons toe te rus om verkeerde leer te weerlê en verkeerde gedrag te identifiseer (2 Tim. 3:16), maar as ons nie meer in die Vader se teenwoordigheid gebring word en dan by mense uitkom deur die Woord nie het ons ver wegbeweeg van die hoofdoel van die Bybel.  Dan is dit tyd om te erken en bely sodat die Heilige Gees weer vars in ons kan werk op hartsvlak, dieper as die verstand en intellek.

BLY AFHANKLIK VAN DIE HEILIGE GEES

"Dit is die Gees wat lewend maak, die vlees is van geen nut nie; die woorde wat Ek tot julle spreek, is gees en is lewe."  Johannes 6:63

Regdeur die Bybel en die geskiedenis van die kerk sien ons dat die begin van 'n werk van God in 'n indiwidu of 'n groep mense lewend en kragtig is, omdat die geroepenes nederig en leerbaar is en totaal afhanklik van God. 

Wat egter keer op keer gebeur is dat dieselfde indiwidue of groep mense (of soms die volgende generasie) wat so kinderlik gehoorsaam was in die begin hulle vertroue begin plaas in ander dinge. Of dit nou is in ons oorwinnings van die verlede, ons superieure kennis van die Bybel, ons ervaring, ons gawes of die feit dat "God darem mos Sy seël op ons groep, gemeente of denominasie gesit het"; ons afhanklikheid het ongemerk geskuif en nou vertrou ons nie meer oomblik vir oomblik op die Heilige Gees om te werk en dinge te verander soos Hý wil nie. 

Dalk was ons intiem betrokke by 'n werk van restourasie, vernuwing en herstel en het ons eerstehands gesien hoe die Heilige Gees mense roep uit verouderde godsdiens-sisteme om hulle nuwe impetus, vreugde en hoop in Christus te gee.  Maar nou het óns die status quo geword en inbeweeg onder die waan dat die Heilige Gees outomaties Sy goedkeuring gaan skenk aan alles wat ons doen.  Ons het die "belangrike mense" geword wat die mag in óns hande het. Ons het begin glo dat as God iets gaan doen in die wêreld Hy dit altyd deur ons sal doen, nie deur ander mense of groepe nie.

"Want jy sê: Ek is ryk en het verryk geword en het aan niks gebrek nie; en jy weet nie dat dit jy is wat ellendig en beklaenswaardig en arm en blind en naak is nie. Ek raai jou aan om van My te koop goud wat deur vuur gelouter is, sodat jy kan ryk word; en wit klere, dat jy jou kan aantrek en die skande van jou naaktheid nie openbaar word nie; en salf om jou oë te salf, sodat jy kan sien." Openbaring 3:17-18

Tyd dan om nederig te raak en te bely dat ons die Gees begin ignoreer het en die pad van onafhanklikheid begin stap het.  Dit is vir seker nie maklik om daar om te draai nie, maar die pad van herstel onder leiding van die Gees is 'n wonderlike en geseënde pad. Mag God ons almal die nederigheid én die moed gee om te erken as ons nie meer in werklikheid wandel in die wysheid en krag van die Heilige Gees nie.

DIE GESAG VAN DIE GEES

Jesus het nie ingepas in die gesagstruktuur van Israel se godsdiens-sisteem nie. Hy was nie in hulle teologiese skole nie en het nie die korporatiewe leer geklim om 'n "vername leraar" te word wat offisiële erkenning het nie. Hy het opgetree in opdrag van die Vader deur die gesag en krag van die Heilige Gees.

"En op een van dié dae, terwyl Hy besig was om die volk in die tempel te leer en die evangelie te verkondig, kom die owerpriesters en die skrifgeleerdes saam met die ouderlinge by Hom staan, en hulle spreek met Hom en sê: Vertel ons deur watter gesag U hierdie dinge doen, of wie dit is wat U hierdie gesag gegee het?" Lukas 20:1-2

In lyn met Sy eie geestelike loopbaan en bediening gee Jesus Sy dissipels opdrag om te wag vir die toerusting van die Heilige Gees, die krag uit die hemel (Hand. 1:8), voordat hulle kon bedien met ware gesag.  Weereens is die gesagstrukture van vormgodsdiens geïntimideer:

"Die volgende dag kom toe hulle owerstes en ouderlinge en skrifgeleerdes in Jerusalem bymekaar, ook Annas, die hoëpriester, en Kájafas en Johannes en Alexander en almal wat van die hoëpriesterlike familie was; en toe hulle hul voorgebring het, vra hulle: Deur watter mag en deur watter naam het julle dit gedoen? Daarop sê Petrus, vervul met die Heilige Gees, aan hulle..." Hand. 4:5-8a

En so loop die storie konsekwent regdeur die geskiedenis van die kerk en tot vandag toe nog. Wanneer gewone mense begin om in die krag van die Heilige Gees op te tree en te bedien, raak die masjinerie van godsdiens omgekrap en wil dit onder offisiële beheer bring. Vormgodsdiens van watter aard ookal sal altyd probeer om te sentraliseer en beheer om die mag in eie hande te hou. Maar 'n mens kan nie die Heilige Gees sentraliseer en beheer nie. Die Heilige Gees hoef nie toestemming te kry by ons institusies om te werk en op te tree nie. Hy is God en kan maak net soos wat Hy goeddink. Ons is nie die "gatekeepers" vir die werking van die Gees nie. Dit is ontsettende arrogansie om te dink dat ons as mense sulke mag het.

Ware dissipels van Jesus is nie anti-gesag nie, maar hulle ore en oë is akuut ingestel om die gesag van die Heilige Gees in elke situasie te onderskei en gehoorsaam.

"Die wind waai waar hy wil, en jy hoor sy geluid, maar jy weet nie vanwaar hy kom en waarheen hy gaan nie. So is elkeen wat uit die Gees gebore is." Johannes 3:8

ONGERED, ONGEHOORSAAM OF ONGESTELD

Ware dissipels van Jesus het nie net vir Hom lief nie, maar ook sy Woord.  Om die waarheid te sê die twee kan nie van mekaar geskei word nie.  Hulle mag nie van mekaar geskei word nie!  Jesus self word "die Woord" genoem (Joh. 1:1 en 14; Openb. 19:13) in die Bybel.  As ek werk met die Bybel moet ek rekening hou met Jesus en as ek Jesus wil volg, kan ek net in die Bybel vind wat dit beteken om 'n ware volgeling te wees.

"En Jesus sê vir die Jode wat in Hom geglo het: As julle in my woord bly, is julle waarlik my dissipels." Joh. 8:31   

Sê jy "ek het Jesus lief en is lojaal aan Hom", dan moet jy ook terselfdertyd kan sê "ek het sy woord lief en is lojaal daaraan".  So wat dan gemaak met 'n situasie vandag waar duisende sê hulle het 'n verhouding met Jesus, maar hulle lees omtrent nooit die Bybel of neem dit enigsins ernstig op nie?  Duisende sê hulle is wedergebore, maar het nog nooit eers een van die 66 Bybelboeke deurgelees of werklik moeite gedoen om self die Bybel te begin bestudeer en gehoorsaam nie.

Het alle ware dissipels van Jesus 'n aptyt vir sy Woord of net party van hulle?  Dit is nie eers 'n moeilike vraag om te antwoord nie.  Die Bybel is duidelik dat alle ware dissipels 'n honger vir die Woord het.  As jy dit nie het nie is een van drie dinge waar van jou lewe.  Jy is of ongered, of ongehoorsaam, of ongesteld. 

Ongeredde mense het 'n aptyt vir baie dinge in die wêreld, maar jy kan hulle nooit werklik opgewonde kry oor die Bybel nie.  Dit bly iets vaag en verwyder van hulle daaglikse lewe en prioriteite.  Dit is die pastoor of dominee se domein, nie hulle s'n nie.  Ongehoorsame dissipels word van binne gedring deur die Heilige Gees om erns te maak met die Bybel, maar daar is altyd 'n honderd en tien ander dinge wat eers aandag moet kry.  Dit is 'n gevaarlike kondisie en as jy volhard daarin word jy uiteindelik ongesteld.  Mense wat fisies siek is verloor hulle aptyt vir kos.  As jy volhard in ongehoorsaamheid word jy geestelik siek, wat beteken dat jy jou aptyt vir die Woord verloor.  Dan is dit krities belangrik dat jy dit sal bely en jou bekeer van jou ongehoorsaamheid met dade wat volg. 

So waar staan jy met die Bybel?  Is jy ongered, ongehoorsaam, ongesteld, of koester jy die woord van Jesus soos wat jy Hom koester en liefhet?

OORVLOEDIGE LEWE VIR OORVLOEDIGE GEHOORSAAMHEID

Ware dissipels van Jesus vra ander vrae in hierdie lewe as mense wat nie wedergebore is nie.  Hulle vrae het primêr te doen met groter gehoorsaamheid aan God, nie meer voorspoed vir hulleself nie.  Die manier wat jy reageer op daardie stelling gaan terloops vir jou iets vertel van wat werklik in jou hart aangaan.

"Verder dan, broeders, vra en vermaan ons julle in die Here Jesus dat julle, soos julle van ons geleer het hoe julle moet wandel en God behaag, nog oorvloediger mag wees." 1Thessalonicense 4:1 

Die apostels se hele bediening in Christus het daaroor gegaan om dissipels te leer hoe om 'n gehoorsame lewe te leef op 'n gevalle planeet en om dit so te leef dat dit God se goedkeuring sou wegdra.  'n Pa kry baie plesier uit 'n gehoorsame kind.  Die evangelie het vir ons kindskap gebring.  Dit het ons hier en nou in direkte verhouding gebring met 'n hemelse Vader. 'n Vader wat ook natuurlik die Heerser van die heelal is.  Daarom volg dit logies dat 'n lewe van gehoorsaamheid vir ons 'n absolute prioriteit moet wees.

In Christus het ons oorvloedige lewe ontvang en daardie lewe is die lewe van God self. Dit is die lewe van die Seun en hierdie Seun het sy Vader in alles gehoorsaam.  Wanneer ons leef in en deur die oorspronklike en unieke Seun se gehoorsaamheid (Rom. 5:19) gee dit vir ons Vader groot plesier, maar terselfdertyd seën en verryk dit ons lewens. 

Wat is die vrae wat jy vra oor jou lewe op aarde?  Geseënd is jy as jy kan sê my grootste vraag is, "hoe kan ek nog oorvloediger wees in gehoorsaamheid aan my regverdige en getroue hemelse Vader"?