LIEFDE SONDER DIE KRUIS IS NIE BYBELSE LIEFDE NIE

"En wandel in liefde, soos Christus ons ook liefgehad het en Hom vir ons oorgegee het as ‘n gawe en offer aan God tot ‘n lieflike geur." Efesiërs 5:2 

Wandel in liefde.  Hoe?  Soos Christus....  Ons behoort nooit die woord "liefde" in die Bybel te lees sonder om aan die kruis van Jesus Christus te dink nie. Dit is een van die grootste dwalinge van ons tyd.  Ons het 'n sentimentele idee van liefde en ons eie sieninge, gevoelens en opinies oor liefde tas dikwels die Bybelse gebruik van die woord aan en verdraai dit tot op die punt waar dit onherkenbaar is in vergelyking met die Bybel.

Die kruis is die verskriklike plek waar God se siening van liefde gedemonstreer is.  Dit is die plek waar Jesus sterf vir verlore rebelle, maar dit is ook die plek waar verlore rebelle sterf saam met Christus en sodoende leer wat liefde werklik is.  Daar is nie liefde sonder dood in die Bybel nie.  Jesus sterf en wys so vir ons wat God se liefde behels.  Ek en jy sterf saam met Hom om vir ander te wys wat liefde is.

"Ons het lief omdat God ons eerste liefgehad het." 1 Johannes 4:19  (NAV)

" ‘n Nuwe gebod gee Ek julle, dat julle mekaar moet liefhê; soos Ek julle liefgehad het, moet julle ook mekaar liefhê." Johannes 13:34  (OAV)

Liefde is 'n groot woord in die Bybel.  Dit is nie goedkoop nie.  Mense wat nie hulle sterwe saam met Christus (Gal. 2:20) wil omhels nie moet eerder nie die woord gebruik nie.  Regtig nie.  Ek is dodelik ernstig.

Ek wil jou vandag nederig vra om nie die woord "liefde" goedkoop te maak in jou gesprekke oor en omgang met die Bybel nie.  Dink oor die implikasies.  Dit het Jesus se dood gekos en vra ook joune saam met Hom as jy wil liefhê soos wat God liefhet. 'n Generasie wat die liefde van die kruis wil opeis, maar nie die liefde deur 'n gekruisigde lewe wil uitwys nie staan op baie dun ys.  Ons is waarskynlik almal tot een of ander mate beïnvloed deur die populêre idee van liefde vandag en het 'n goeie wassing van die Woord nodig in hierdie area.  

MOENIE JOU ORE VERLOOR NIE

”En Hy sê vir hulle: Wie ore het om te hoor, laat hom hoor." Markus 4:9 

Het almal dan nie ore nie?  Klaarblyklik nie.  Party mense gee ag op God se stem en ander nie.  Jesus sê dat die wat wel ag gee seker moet maak dat die boodskap by hulle harte uitkom.

Ware dissipels het ore, maar hulle kan ook begin om hulle "ore te verloor" as hulle nie hierdie opdrag van Jesus gehoorsaam nie.  As ons aanhou luister na waarheid sonder dat dit ons hart bereik en dan deur die krag van die Gees in dade oorgaan, gebeur daar onvermydelik iets met ons geestelike gehoor.

"Waaroor ons veel te sê het wat swaar is om te verklaar, omdat julle traag geword het om te hoor." Hebreërs 5:11 

As jy voel dat dit met jou aan die gebeur is of reeds die geval is, moenie wag nie.  Gaan dadelik na die troon van genade en vra die Vader om jou gehoor te herstel. Bely jou traagheid m.b.t. geestelike werklikhede en vertrou God om herstel te bring.

WEES 'N STEM VIR DIE WAT NIE EEN HET NIE

"Reine en onbesmette godsdiens voor God en die Vader is dít: om wese en weduwees in hulle verdrukking te besoek..." Jakobus 1:27 

'n Skrywer wat self 'n weeskind was sê in een van sy boeke dat alle kinders soos dryfhout is wat rondgeslinger word deur die eb en vloei van volwassenes se lewens.  Dit is ongelukkig so en in die geval van 'n mens se eie kinders word jy hopelik deur die Woord en Gees van God gelei om met groot vrees en bewing daardie kosbare lewe, of lewens, te rig wat aan jou toevertrou is.  Baie weeskinders het egter nie die voorreg om sulke ouers te hê nie en is dikwels oorgelaat aan 'n maatskaplike sisteem wat nie deeglike wigte en teenwigte ("checks and balances") het of neutrale oorsig oor wat daar gebeur nie en wat soms skreiend teen die sogenaamde "beste belang van die kind" optree.  Die geskiedenis vertel vir ons baie welsprekend uit duisende monde van sulke kinders wat nou volwassenes is, wat die "sisteem" met hulle gemaak het.

Jou eie kinders het stemme omdat jy hulle toelaat om te praat en vertel wat in hulle harte aangaan.  Hulle kan sonder vrees sê wat hulle bly en hartseer maak en hulle kan hulle lewensvrae vra.   So leer jy hulle om die lewe reg te hanteer.  Weeskinders kom egter baie gou agter dat hulle nie stemme het nie en maar vinnig moet leer om saam met die stroom van grootmens-besluite te swem ongeag hoe onregverdig, en in baie gevalle wreed, daardie besluite mag wees.  Vergete, onsigbaar en stemloos beweeg baie van hulle deur die kinderjare en leer maar om te oorleef.

Maar God gee om en Hy verwag van ons om ons oë oop te maak en waar ons kan in ons invloedsfeer vir daardie kinders 'n stem te wees wat hulle nie self het nie.  Of dan ten minste die nood raak te sien en te begin bid daarvoor.  Anders wat beteken hierdie vers in Jakobus dan?  Is dit vir ons maar net 'n mooi godsdienstige versie wat ons op 'n Sondag vroom aanhoor?  Ons Almagtige God se onomstootlike uitspraak is dat "reine godsdiens" beteken dat ek weeskinders begin raaksien en iets prakties doen om te help.  Daar is na beraming 3.7 miljoen weeskinders in Suid Afrika en ongeveer 150 000 kinders wat in huishoudings is waar hulle ouer boeties of sussies die rol van pa of ma moet vervul, want daar is nie 'n volwassene in die huis nie.

Dit mag selfs beteken dat God my gesin lei om 'n kind aan te neem en vir daardie kind met tasbare liefde te demonstreer dat daar 'n Skepper en Vader is wat omgee vir wese.  'n Vader wat vir hulle 'n stem wil gee sodat hulle geestelik, emosioneel en verhoudingsgewys reg kan ontwikkel en by gesonde en volwasse menswees kan uitkom.  Wat sê die Heilige Gees vir jou oor hierdie saak?  

DIE VADER WERK ANDERS

"Vir so iemand is daardie bestraffing deur die meerderheid genoeg;  sodat julle daarenteen hom liewer moet vergewe en vertroos, dat so iemand nie miskien deur al te groot droefheid verteer word nie.   Daarom vermaan ek julle om die liefde aan hom te bevestig." 2 Korinthiërs 2:6-8 

Paulus vra die Korinthiërs om 'n broer te vergewe en bemoedig wat klaarblyklik onder sensuur geplaas is, maar hom toe bekeer het. Daar is 'n tere liefde wat deurskyn in Paulus se gesindheid teenoor die een wat gesondig het. Hy wil hê die dissipels in Korinthe moet weet dat die Vader se hart oop is vir berouvolle dissipels. Die satan se manier is om mense te verwoes en so moedeloos te maak deur versoeking, sonde en dan veroordeling, dat hulle opgee. Die Vader werk anders met mense.

Ons moet baie wakker wees om nie in satan se hande te speel deur te veroordeel en mense moedeloos te maak nie. Kerk dissipline is 'n opdrag in die Bybel, maar ook vergifnis en vertroosting wanneer daar ware bekering is.

NET JOU EIE GELOOF KAN JOU VRY MAAK

"Nie dat ons heers oor julle geloof nie, maar ons is medewerkers aan julle blydskap; want in die geloof staan julle vas."  2 Korinthiërs 1:24 

Dit is werklik verstommend om te sien dat selfs die apostels wat die Nuwe Testament geskryf het nie probeer het om in te dring in die heiligdom van die dissipel se persoonlike geloof in Jesus nie.  Ons leef in 'n dag waar hedendaagse apostels en baie predikers en leraars sonder om te skroom instorm in daardie heilige plek van die individu se hart en dissipels dan met groot bravade meesleur in die illusie dat die apostel of leraar se geloof hulle kan dra en vrymaak. Dit is 'n reuse mistasting en ongelukkig so algemeen vandag dat die meeste mense nie eers dink daaraan om dit te bevraagteken nie.  Die waarheid is dat ander se geloof jou nooit werklik kan vry maak en vir jou volkome vreugde in Christus kan bring nie.

Ander dissipels en bedienaars se geloof kan jou stimuleer en kragtig inspireer om self die heilige grond van jou hart met geloof te bearbei, maar niemand op hierdie aarde kan ooit vír jou glo of 'n substituut wees vir jou eie intimiteit met God nie.  Vir hierdie rede leer Paulus dat die essensie van ons dissipelskap juis ons eie omgang met die Woord en ons eie geloofsoortuiging is, en dit des te meer wanneer daar nie ander dissipels of bedienaars by ons is nie.

"Daarom, my geliefdes, soos julle altyd gehoorsaam gewees het, nie in my teenwoordigheid alleen nie, maar baie meer nou in my afwesigheid, werk julle eie heil uit met vrees en bewing."  Filippense 2:12 

Dit is juis wanneer ons met ons eie hart en hande die heilige waarhede van die evangelie hanteer dat ons groei en sterk word in Christus.  Anders bly ons afhanklik van ander se geloof en is ons ervaring van God ook tweedehands.  God nooi jou vandag uit om op te staan in jou eie geloof sonder vrees of twyfel, want dit is Hý wat persoonlik en intiem werk in elke dissipel se hart.  Dieselfde God wat vir Paulus, Petrus en hedendaagse geloofshelde stap vir stap gelei het, leef ook in jou as jy wederbaar is deur die Gees van God.  Staan op en glo!  Hy leef in my, Hy werk in my, Hy wag vir my persoonlike respons op Sy Goddelike aktiwiteit in my binneste (Fil. 2:13).

RUS VAN JOU WERKE EN WERK DAN UIT RUS

Ons hele lewe as dissipels van Jesus word opgesom met hierdie frase.  Eerstens leer die Bybel ons om te rus van ons eie werke.  Dit is nodig omdat niks wat ons uit onsself doen ons voor God kan regverdig nie en niks wat ons uit onsself doen God ooit sal behaag nie.

"Kom na My toe, almal wat vermoeid en belas is, en Ek sal julle rus gee." Mattheüs 11:28 

"Daar bly dus ‘n sabbatsrus oor vir die volk van God;  want wie in sy rus ingegaan het, rus ook self van sy werke soos God van syne. Hebreërs 4:9-10 

Tweedens leer die Bybel ons om te werk uit rus.  God is aktief aan die werk in ons innerlike mens, maar ons kan net Sý werke in ons onderskei wanneer ons gerus het van ons eie pogings om 'n geestelike en morele mens te wees.  In hierdie sabbatsrus begin ons die werke van God ín ons beleef en dan staan ons onder verpligting om kinderlik gehoorsaam te wees aan dit wat God in ons binneste doen.

"Daarom, my geliefdes, soos julle altyd gehoorsaam gewees het, nie in my teenwoordigheid alleen nie, maar baie meer nou in my afwesigheid, werk julle eie heil uit met vrees en bewing;  want dit is God wat in julle werk om te wil sowel as om te werk na sy welbehae." Filippense 2:12-13 

So ons kan die vraag vra: "Is 'n dissipel 'n pasifis of 'n aktivis?"  Nie een nie.  Hy is albei.  Ware dissipels is vir seker aktief, maar hulle doen net wat God in hulle innerlike openbaar, en dit vanuit rus in Christus.

Hier is ons voorbeeld:

"Jesus het toe geantwoord en vir hulle gesê: Voorwaar, voorwaar Ek sê vir julle, die Seun kan niks uit Homself doen tensy Hy die Vader dit sien doen nie. Want alles wat Hy doen, dit doen die Seun ook net so." Johannes 5:19

En hier is ons huidige werklikheid en verantwoordelikheid:

"Ek is die wynstok, julle die lote. Wie in My bly, en Ek in hom, hy dra veel vrug; want sonder My kan julle niks doen nie." Johannes 15:5  

ALLES HET VERANDER MET JESUS SE VLEESWORDING

Alles het verander met Jesus se koms na hierdie aarde. Hoekom?  Want nie net was Hy die Messias van die Jode nie, Hy was ook van die begin van die skepping af die Een deur wie en tot wie alle dinge geskape is.

"Want in Hom is alle dinge geskape wat in die hemele en op die aarde is, wat sienlik en onsienlik is, trone sowel as heerskappye en owerhede en magte—alle dinge is deur Hom en tot Hom geskape." Kolossense 1:16 

En meer as dit, alle dinge word slegs in Hom in stand gehou.

"En Hy is voor alle dinge, en in Hom hou alle dinge stand." Kolossense 1:17 

Daarom is dit absoluut essensieël vir ons om alle dinge te weeg en bereken in verhouding met Jesus.  Nie net is die gelowige Jode se benadering tot hulle godsdiens vir altyd verander nie, maar alles in die skepping het 'n nuwe betekenis gekry met die openbaarmaking van "die mens Christus Jesus" (1 Tim. 2:5). Ons hele lewe op aarde en ons ewige bestemming het vir altyd verander in Christus. Ons moet ons denke vernuwe om oor elke aspek van ons lewens te dink binne die ruimte van die Christus-openbaring.  Nie net ons "geestelike lewe" nie.  Blaai bietjie na Kolossense 1 en lees verse 15 tot 20 in hierdie lig.

DIE DODELIKE GEVAAR VAN 'N MENS-GERIGTE BOODSKAP

Die Nuwe Testament lê oor en oor klem op ons hemelse identiteit, roeping en bestemming.  Ons is burgers van die koninkryk van die hemele, ons is "deelgenote van die hemelse roeping" (Heb. 3:1), ons het volgens Hebreërs 12:22 reeds gearriveer by die "hemelse Jerusalem" en ons staan onder 'n bevel van God om die "dinge wat daar bo is" te soek en bedink (Kol.3:1-2).  Boonop word daar in die sterkste moontlike terme 'n oordeel uitgespreek oor die wat slegs aardse dinge bedink

"Hulle einde is die verderf, hulle god is die buik en hulle eer is in hulle skande; hulle bedink aardse dinge." Filippense 3:19 

Volgens die Nuwe Testament het ons gesterf saam met Christus en behoort ons nou eksklusief aan God sodat ons die belange van Sy hemelse koninkryk op ons hart kan dra.  God is nie onbetrokke by ons aardse omstandighede nie, maar Hy roep alle dissipels op om allereers en in elke omstandigheid Sý koninkryk te soek, Sý naam te vereer en Sý wil uit te voer (Matt. 6:9-10 en 33). 

Daarom is boodskappe wat net fokus op mý omstandighede, mý finansies, mý gesondheid en mý sukses 'n erge misbruik van die Skrifte en 'n baie ernstige mistasting.  God het ons gered om op Hom te fokus.  Hy weet mos in elk geval hoe om te kyk na Sy kinders en Hy gee ons wat ons werklik nodig het, nie wat ons dink ons moet hê nie.  Sý fokus is om van ons geestelike mense te maak wat besorg is oor verlore mense, dissipelskap, geestelike groei en die uitbreiding van Sy koninkryk.  Wees op die uitkyk vir boodskappe wat Bybeltekste uit konteks aanhaal om 'n mens-gerigte "evangelie" te probeer regverdig.  Dit is dodelik gevaarlik en die slagoffers tel in die tien duisende in ons generasie.