DIE WOORD VAN SY GENADE WAT MAGTIG IS OM OP TE BOU

"En nou, broeders, dra ek julle op aan God en aan die woord van sy genade, wat magtig is om julle op te bou en julle ‘n erfdeel te gee onder al die geheiligdes." Handelinge 20:32 

Na drie jaar van bediening in Efese en voor sy vertrek na verdere velde van bediening seën die apostel Paulus die ouderlinge in daardie gemeente met hierdie kosbare doksologie.  Hierdie "laaste woorde" van Paulus is egter meer as net 'n doksologie.  Dit is in 'n sin ook 'n opdrag. 

Paulus kon hulle opgedra het aan een of ander apostoliese leier, 'n spesifieke kerkorde of 'n briljante bedieningstrategie, maar in plaas daarvan dra hy hulle op aan God en baie spesifiek aan "die woord van sy genade".  Hy het genoeg vertroue gehad in die meriete van die ewige evangelie om te rus in die feit dat die inhoud van hierdie evangelie in staat was om dissipels nie net te onderhou nie, maar ook op te bou.

Vir drie jaar het hy hulle met goddelike ywer geskool in die boodskap van genade.  Hierdie genade het hulle geroep, gewas, geregverdig, geheilig en verenig met Christus en het derhalwe ook die krag gehad om hulle te onderhou en te bou.  Kyk bietjie wat sê Paulus vir die gelowiges in Kolosse oor hierdie einste genade.

"Wat julle sowel as die hele wêreld bereik het; en dit dra vrug, net soos onder julle ook, van die dag af dat julle dit gehoor het en die genade van God in waarheid leer ken het." Kolossense 1:6 

Paulus het geen vertroue in die vlees geplaas of in mense se vermoë om ander mense op die lange duur in waarheid te onderhou en te inspireer nie.  Die sukses van sy bediening was direk gekoppel aan die krag van die evangelie d.m.v. die openbaring van genade wat uitsluitlik die harte van manne en vroue standhoudend kon inspireer.  Alhoewel hy die "apostel van die heidene" was, het hy geen vertroue in sy eie gawes of in 'n metodiek of iets dergeliks geplaas nie.  Sy intense fokus was onbeweeglik geanker in die openbaring van genade wat deur die persoon en verlossingswerk van Jesus Christus aan die lig gebring is.

"Maar wat nou geopenbaar is deur die verskyning van ons Verlosser, Jesus Christus, wat die dood tot niet gemaak het en die lewe en die onverderflikheid aan die lig gebring het deur die evangelie." 2 Tim. 1:10 

"Want ek het my voorgeneem om niks anders onder julle te weet nie as Jesus Christus, en Hom as gekruisigde." 1 Korinthiërs 2:2 

Is dit nie dalk tyd vir die gemeentes van God om die implikasies van hierdie en soortgelyke tekste in die Nuwe Testament in kinderlike eenvoud en op sigwaarde te omhels nie?  Vertrou ons nie te dikwels op menslike planne, organisasie en dinamiese leierskap om te doen wat slegs die "woord van sy genade" in die indiwidu se hart kan doen nie?  Moet ons nie liewer ons kragte inspan om hierdie kosbare evangelie deur die werk van die Heilige Gees aan elke dissipel te bedien totdat daardie hart geheel en al oorweldig is deur die openbaring van genade nie?  Ek los hierdie vrae by jou vir biddende oorweging.  Daar is geen plaasvervanger in bediening vir die innerlike werking van God se genade in die menslike hart nie.

STERK MEDISYNE VIR DIE DWAAS-DWALENDE HART VAN ADAM

Geen appél om jou rug te keer op die legio afleidings van die teenswoordige wêreld (wat klaarblyklik eksponensieël vermeerder in ons tyd) sal slaag as jy nie daarteenoor die heerlikheid en lieflikheid van God en gemeenskap met Hom met die geloofsoog sien nie.

Die Bybel verkondig nie 'n soort tandknersende asketisme (wel selfbeheersing vanuit die krag van die Christus-openbaring: 1 Kor. 9:27) om die vele versoekings van die wêreld te weerstaan nie (Kol. 2:20-23).  Dit openbaar liewer die lieflikheid en heerlikheid van God om in die lig van Sy aangesig die leegheid van die wêreld te openbaar en ons op te roep tot ware aanbidding (Kol. 3:1-4).  Niks anders sal ooit ons harte kan bevredig nie.

Ja sekerlik kan en moet ons leef in voortdurende dankbaarheid vir al die goeie gawes wat ons gegun word in die hier-en-nou.  As ek egter nie gedurig my hart daaraan herinner dat hierdie dinge tydelik en verganklik is en nie bedoel of ontwerp vir ewigdurende satisfaksie nie word die goeie gawes afgode wat my weglei van die enigste Bron van totale bevrediging en onuitspreeklike vreugde.

Maak asseblief 'n tydjie om rustig en biddend die tekste wat volg te bedink en let op dat die kragtige "teen-aantrekking" teenoor die wêreld se versoekinge altyd die lieflike heerlikheid van God is.

"Daarna bring die duiwel Hom op 'n hoogte en wys Hom in 'n oogwink al die koninkryke van die wêreld.  Toe sê die duiwel vir Hom: “Aan U sal ek al hierdie mag en majesteit gee, want dit is aan my oorgegee, en ek gee dit aan wie ek wil.  Dit sal alles aan U behoort as U maar net voor my buig en my aanbid.”  Daarop antwoord Jesus: “Daar staan geskrywe: Die Here jou God moet jy aanbid en Hom alleen dien.”  Lukas 4:5-8 

"Jesus antwoord en sê vir haar: Elkeen wat van hierdie water drink, sal weer dors kry;  maar elkeen wat drink van die water wat Ek hom sal gee, sal in ewigheid nooit dors kry nie, maar die water wat Ek hom sal gee, sal in hom word ‘n fontein van water wat opspring tot in die ewige lewe." Johannes 4:13-14 

"Moenie die wêreld liefhê of die dinge wat in die wêreld is nie. As iemand die wêreld liefhet, dan is die liefde van die Vader nie in hom nie." 1 Johannes 2:15 

"Hom wat ons gesien en gehoor het, verkondig ons aan júlle, sodat julle aan ons gemeenskap deel kan hê. En die gemeenskap waaraan ons deel het, is dié met die Vader en met sy Seun, Jesus Christus." 1 Johannes 1:3 

"Ja waarlik, ek ag ook alles skade om die uitnemendheid van die kennis van Christus Jesus, my Here, ter wille van wie ek alles prysgegee het en as drek beskou, om Christus as wins te verkry." Filippense 3:8 

"En terwyl ons almal met onbedekte gesig soos in ‘n spieël die heerlikheid van die Here aanskou, word ons van gedaante verander na dieselfde beeld, van heerlikheid tot heerlikheid, as deur die Here wat die Gees is." 2 Korinthiërs 3:18  

TYD OM TE FOKUS: DIE TEENSWOORDIGE WÊRELD IS OPPAD UIT

'n Dissipel se belangstellings behoort toenemend te skuif na die werklikheid van die koninkryk van God. Minder opgeneem met kos, tuine, televisie, fone, rekenaars, klere, musiek, vakansies en die honderde elektroniese afleidings van ons tyd. Meer met Jesus en Sy teenwoordigheid, gebed, die Woord, die koninkryk wat ons erfenis is en ons sendingtaak in die teenswoordige wêreld.

"Ek bedoel dít, broers: die tyd is min. Van nou af moet dié wat getroud is, leef asof hulle nie getroud is nie;  en dié wat bedroef is, asof hulle nie bedroef is nie; en dié wat bly is, asof hulle nie bly is nie; dié wat iets aankoop, asof hulle dit nie besit nie.  Ja, dié wat met die dinge van die wêreld te doen het, moet leef asof hulle daar niks aan het nie, want hierdie wêreld soos ons hom ken, is aan die verbygaan." 1 Korinthiërs 7:29-31 

Maak los van die tydelike; die lieflike dimensie van die ewige het oopgegaan in Christus.  Die leegheid van hierdie wêreld is eintlik verstommend, selfs met al die moderne vermaak!  As jy leef in en vir hierdie wêreld gaan dit jou totaal ontnugter en depressief los.  Dit is eers wanneer jy begin leef met jou hart en denke in die geestelike dimensie waar jou lewe "saam met Christus verborge is in God" (Kol. 3:3) dat jou lewe op aarde begin betekenis kry.  Eers dán begin jy perspektief kry en begin jy die regte dinge na waarde skat en die vermoë ontwikkel om dit wat bloot tydelik is in verhouding tot die ewige te beoordeel.

KEER JOU RUG OP MENSLIKE IDEES VAN BONATUURLIKE REALITEITE

Christenskap is nie mense wat soos Jesus probeer wees nie, maar die wese van Jesus vergestalt in mense (Gal. 4:19). Dissipelskap is nie die navolging van Jesus in menslike krag nie, maar die toegee aan die bonatuurlike trekkrag van Jesus in my binneste. Geloof is nie my poging om vertroue in my hart op te wek nie, maar eerder die effek wat die aanskoue van Jesus in my hart bewerkstellig. Liefde vanuit God se perspektief is nie enigiets wat mense ooit kan uitdink of produseer nie, maar eerder die natuur van Jesus wat deur bogenoemde geloof in my gevorm word en deur die Gees tot uitdrukking kom.

Derduisende mense leef verwarde lewens onder die illusies van dit wat Christenskap, dissipelskap,  geloof en liefde nié is nie en nooit sal wees nie. Aanskou die heerlikheid van Christus en ontsnap van hierdie menslike idees van dit wat slegs deur die openbaring van die Gees verstaan kan word (2 Kor. 3:18; 1 Kor. 2:6-16).

DIE RUSPLEK VAN GOD

"Want die Here het Sion uitgekies, Hy het dit as woonplek vir Hom begeer en gesê:  ‘Dit is my rusplek vir ewig; hier wil Ek woon, want Ek het dit begeer'."  Psalms  132:13-14 

Dit is absoluut verstommend dat die lewende God, die Skepper van die eindes van die aarde en bewerker van die wye heelal ‘n spesifieke plek gekies het om vir ewig te woon.  Hierdie plek word in die Bybel Sion genoem.  As ons hierdie plek Sion kan  bereik, is ons verseker van ‘n nimmereindigende welstand, want waar God is, is daar heerlikheid, seën en lewe wat vir ewig duur. 

Waar is Sion dan?  Die woord "Sion" kom meer as 150 keer voor in die Bybel en het 'n besonderse geestelike betekenis en waarde.  As ons na die Ou Testament gaan, vind ons dat Sion 'n vesting was van die Jebusiete.  Toe Dawid dit van die Jebusiete afgeneem het (Jos. 15:63; 2 Sam. 5:7,9), het hy ‘n stad en ‘n paleis daar gebou en dit het bekend geraak as ‘die stad van Dawid’ (1 Konings 8:1).  Sion is in die Ou Testament geassosieer met die tempel en die teenwoordigheid van God (Ps. 2:6, 48:2; Jer. 31:6), as't ware die geestelike middelpunt van Jerusalem.  Dit is die plek vanwaar Dawid sy heerskappy as koning gevestig het.

As ons na die Nuwe Testament gaan, moet ons in gedagte hou dat Jesus die teëbeeld van Dawid is en dus die ware Heerser oor alles en almal (Ps. 2). In Hebreërs 12 vers 22 sien ons dat die gemeente van die Here by die berg Sion en die stad van die lewende God gekom het, die "hemelse Jerusalem".  Hierdie "hoë grond" van die fisiese Jerusalem verteenwoordig dus die hoogtepunt van God se ewige doelstelling en heilige ekonomie waar die Ou Testament ‘n skadubeeld en prent van die geestelike realiteite van die Nuwe Testament is.  In hierdie konteks neem die openbaring van die heerlike toekoms van die gemeente van God in Efesiërs 2 vers 22 ‘n baie spesiale betekenis aan. 

"…in wie [Christus] julle ook saam opgebou word tot ‘n woning van God in die Gees." 

 As die liggaam van Christus bevind ons, ons in hierdie heerlike plek genaamd Sion en ons word nou opgebou tot ‘n ewige woning van God.   Wat ‘n voortreflike en wonderbare gedagte!  Die ewige en soewereine God gaan nie net vir ewig binne-in en tussen ons woon nie, maar die Woord sê dat Hy spesifiek begeer om by ons te wees.  Laat ons derhalwe ons oë ophef bokant die tydelike en vlietende dinge van hierdie wêreld en ons wedloop met vreugde voltooi, want ‘n onuitspreeklike heerlike toekoms wag vir ons saam met die Een wat in die ewigheid woon. 

"Uit Sion,  die volkomenheid van skoonheid, verskyn God in ligglans."  Psalms 50:2

DIE WYNSTOK EN DIE LOTE

In die evangelie van Johannes openbaar Jesus op ‘n unieke wyse sy intieme verhouding met sy Vader.  Geen ander evangelie gee ons hierdie insig in die innerlike eenheid en intieme verhouding wat Jesus met Sy Vader gehad het nie.  So baie mense sien net die uiterlike woorde en dade van Jesus raak in die evangelies, maar Johannes openbaar vir ons Sy lewe agter die skerms. Hy trek die gordyn weg. Wat 'n onuitspreeklike voorreg om insae hierin te mag hê!

Die openbaring in die Johannes evangelie van Jesus se diepe verhouding met sy Vader is baie spesifiek bedoel om geloof in óns harte te wek dat so 'n verhouding nou ook vir ons moontlik is.  Ons verhouding tot Jesus is die van ‘n loot tot ‘n wynstok, ‘n lewende eenheid.  Hierdie intieme lewe van eenheid moet gevoed en gekoester word.  Net soos Jesus in Sy tyd op aarde totaal afhanklik was van die lewe en leiding van Sy Vader is ons ook nou afhanklik van Jesus.  Vergelyk byvoorbeeld Johannes 5 vers 19 met Johannes 15 verse 4 en 5:

 "Voorwaar, voorwaar Ek sê vir julle, die Seun kan niks uit Homself doen tensy Hy die Vader dit sien doen nie.  Want alles wat Hý doen, dit doen die Seun ook net so."

"Bly in My, soos Ek in julle.  Net soos die loot geen vrug kan dra van homself as dit nie in die wynstok bly nie, so julle ook nie as julle in My nie bly nie.  Ek is die wynstok, julle die lote.  Wie in My bly, en Ek in hom, hy dra veel vrug; want sonder My kan julle niks doen nie."

Kyk bietjie hoe Paulus op sy beurt hierdie kosbare waarheid beklemtoon in, onder andere, die boek Galasiërs:

"Ek is met Christus gekruisig, en ék leef nie meer nie, maar Christus leef in my. En wat ek nou in die vlees lewe, leef ek deur die geloof in die Seun van God wat my liefgehad het en Homself vir my oorgegee het." Gal. 2:20 

"My kinders, vir wie ek weer in barensnood is totdat Christus in julle ‘n gestalte verkry." Gal. 4:19 

Hier volg ‘n lys van tekste in Johannes wat aan ons die innerlike lewe van Jesus in Sy tyd op aarde openbaar:   Johannes 4:34; 5:19; 5:30; 6:38; 7:16; 8:26; 8:28; 8:38; 9:4; 12:49-50; 14:10; 14:24 en 14:31. 

Die inhoud van hierdie tekste is krities belangrik vir dissipels van Jesus.  Neem dit en maak dit jou eie.  Dit is bedoel om 'n legio verhoudingsmoontlikhede vir jou hart af te skilder sodat jy kan begin om te leef vanuit die lewe in die Wynstok soos wat jy jou eie wysheid, bronne en kragte laat vaar.

AARDSE REPUTASIE OF HEMELSE IMPAK: WAT VERKIES JY?

"Dieselfde gesindheid moet in julle wees wat daar ook in Christus Jesus was:  Hy wat in die gestalte van God was, het sy bestaan op Godgelyke wyse nie beskou as iets waaraan Hy Hom moes vasklem nie,  maar Hy het Homself verneder deur die gestalte van 'n slaaf aan te neem en aan mense gelyk te word." Filippense  2:5-7 

Jesus het nie vasgehou aan sy posisie nie, maar dit vrywillig afgelê sodat Hy die Vader gehoorsaam kon wees en die sondige mensedom kon verlos.  Jesus kon as die Seun van God in menslike vorm verskeie posisies aangeneem het, maar Hy is in ‘n stal gebore as die seun van ‘n nederige timmerman.  Meer nog, in sy lewe op aarde was Hy nooit net bekend as die timmerman se seun met een of ander spesifieke talent nie, maar Hy was bekend as ‘n dienaar.  Jesaja 53 vers 2 sê 'Hy het geen gestalte of heerlikheid gehad, dat ons Hom sou aansien nie, en geen voorkoms, dat ons Hom sou begeer nie.’ 

Ons sien egter in die Nuwe Testament dat skares na Hom gestroom het.  Wat het hulle so aangetrek?   Hulle is aangetrek na sy wese, nie sy vorm nie.   Dit was die lewe binne-in Jesus wat mense na Hom toe aangetrek het, nie die omhulsel waarin daardie lewe toegedraai was nie.  Dit is absoluut noodsaaklik vir die gemeente van Jesus om hierdie les te leer.  Ons Skrifgedeelte uit Filippense is nie geskryf net om ons te vergewis van die nederige vorm wat Jesus op aarde aangeneem het nie, maar spesifiek om ons te vermaan om in hierdie verband in die voetstappe van Jesus te volg.  

Wanneer ons kyk hoe die wêreld werk,  sien ons dat dit alles oor die verpakking gaan. Wat vir die wêreld saak maak, is die uiterlike, die beeld of afbeelding daarvan.  Dit is waarom groot maatskappye honderdduisende rande daaraan bestee om die regte beeld by die publiek te skep.   As gemeente van die Here moet ons leer, en gou leer, dat dinge in die koninkryk van God nie so werk nie.  In elke enkele geval dwarsdeur die kerk se geskiedenis waar die kerk probeer het om dinge op ‘n wêreldse manier te doen, was dit ‘n geestelike mislukking.  Dit was nie noodwendig ‘n logistieke mislukking nie, maar definitief ‘n geestelike mislukking. 

Die Skrif leer baie duidelik en onomwonde dat God deur die gestalte van dienaars werk.  Hierdie is een van die groot toetse in die lewe van 'n dissipel.  Hoe verwys mense na jou?  Nog belangriker, hoe wil jy graag hê hulle moet jou sien?  Die vyand fokus altyd ons aandag op een of ander spesiale aspek van ons wat ons trots en eiewaan voed.   Is jy, of wil jy graag beskou word as die ‘vooraanstaande een, die skrander een, die geleerde een, of dalk die beeldskone een’?   Wat van ‘die hardwerkende een, die vrygewige een, die begaafde een, die musikale een’?   'n 'Man van invloed en mag’ is nog ‘n gesogte benaming.  En dan, ironies genoeg, is daar diegene wat graag die titel van die ‘nederige een’ wil hê.   

En dan is daar natuurlik die saak van titels.  Sommige mense hou so daarvan om ‘doktor’ of ‘professor’ of selfs ‘pastoor’ of ‘dominee’ genoem te word.  Hier is dit weereens ‘n saak van identiteit.  Die gelowiges wat aan ‘n vorm vashou, is dikwels diegene wat nog nie besef dat hulle ‘n totaal nuwe identiteit in Christus ontvang het en dat die uiterlike vorm dus nie meer van belang is nie.  Ons gaan almal deur verskillende vlakke en roepings in die lewe en derhalwe is die punt nie of jy ‘n professor of ‘n kelner is nie.  Die diepgaande vraag is hoe jy verkies om geken te word.  

Is ons smagting na ‘n reputasie in die gemeenskap nie een van die hoofredes waarom ons die krag van die Gees in die kerk verloor het nie?   God werk slegs kragtig deur nederige dienaars – mense sonder aansien.  Hy wil nie sy eer met mense deel nie.  As jy dit self wil doen, doen dit dan, maar moenie van God verwag om die Heilige Gees se stempel van goedkeuring op jou lewe af te druk nie.   

Daar is geen gebrek aan gawes in die kerk nie.  Die vraag ontstaan egter:  Is ons gewillig om óns aansien prys te gee sodat God Sý magtige teenwoordigheid deur dienaars kan manifesteer?   Hierdie prysgee van aansien is iets wat in jou eie hart moet begin.  Die toets vir ‘n geestelike man lê nie in sy prestasies en oorwinnings nie, maar in die effek wat daardie prestasies het op die dunk wat hy van homself het. Sal die kerk staande kan bly in hierdie belangrike saak of sal ons volkome swig voor die gees van hierdie wêreld en aansien kies liewer as heilige nederigheid en derhalwe hemelse krag?    

"Wees eensgesind onder mekaar; moenie na hoë dinge streef nie, maar voeg julle by die nederige..."  Romeine 12:16

DIE GOEIE WERKE WAT REEDS VIR JOU VOORBEREI IS

"Want ons is sy maaksel, geskape in Christus Jesus tot goeie werke wat God voorberei het, sodat ons daarin kan wandel."  Efesiërs  2:10 

Ons is nie net gered om hemel toe te gaan nie. God wil die oorvloed van Sy genade in en deur ons vertoon.   Ons kan egter nooit uit ons eie krag en vernuf goeie werke doen wat vir God aanneemlik is nie.   God het alreeds ons goeie werke vir ons voorberei.  Ons moet slegs gewillig,  wakker  en gereed wees om met Hom te wandel.    Daar is daagliks baie geleenthede rondom ons om te dien en ‘n seën te wees.  Hou jou oë oop vir die goeie werke wat God vir jou voorberei het.  Dit is net daardie werke wat ewige beloning inhou.

As ons in die ongeforseerde ritme van genade wandel, is hierdie lewe van diensbaarheid nooit vir ons ‘n las nie, hoewel dit baie opoffering mag vra.   Die rede waarom goeie werke (soos ons dink daaroor) soms vir ons meer van ‘n frustrasie as ‘n seën kan wees, is omdat ons die kruik verwar met die inhoud.   Ons is kruike van God se heerlikheid; ons is nie die heerlikheid self nie. 

God  het Christus in elke gelowige geplaas en Hy alleen is die Een wat die vrug in ons produseer.  Ons kan nooit vrugte dra wat God behaag as ons probeer om kunsmatige vrug van buite te dra nie.    Dit is slegs as ons in die wynstok (Christus) ingeënt is, dat ons spontaan vrug begin dra.   Elke gelowige het die heilige inhoud (Christus)  binne-in hom.  Wat ‘n vreugde is dit om te besef dat God nie van jou verwag om vrug in en deur jouself te dra nie.