"En nou bly geloof, hoop, liefde—hierdie drie;
maar die grootste hiervan is die liefde." 1 Korinthiërs 13:13
Christene se
innerlike dryfkrag is geloof, hoop en liefde. Die wêreld s'n is prestasie,
ambisie en eie-belang.
Hierdie radikale
kontraste tussen die ou en die nuwe skepping moet reg van die begin af baie
duidelik uitgespel word vir ons kinders en diegene met wie ons 'n pad van
dissipelskap stap.
Geloof, hoop en
liefde is as't ware die petrol in ons tenk waarsonder ons nie kan vorder as
dissipels van Jesus nie. Ons vertrou nie op onsself en ons eie vermoëns nie,
ons verwagting is nie gesetel in die tydelike wêreld nie en ons leef nie meer
vir onsself nie, maar vir Christus en ander mense.
"Ons dank God altyd oor julle almal as ons aan
julle dink in ons gebede en onophoudelik
in gedagte hou die werk van julle geloof en die arbeid van julle liefde en die
lydsaamheid van julle hoop op onse Here Jesus Christus, voor onse God en Vader."
1 Thessalonicense 1:2-3
Dit is egter moontlik
om hierdie krities belangrike waarheid aangaande 'n lewe van geloof, hoop en
liefde ywerig vir jou kinders te leer oor 'n tydperk van jare en hulle steeds
te los met 'n onderliggende gevoel van onvervuldheid.
Hoekom? Want geloof, hoop en liefde kan steeds gesien
word as slegs dinge wat ons moet doen en gesindhede wat ons moet hê. Die fokus kan dus grotendeels op myself wees
en wat van my verwag word. Die Bybel
leer egter dat geloof, hoop en liefde net wortel kan skiet en groei in my hart
wanneer God en Sy wonderlike eienskappe en Sy kosbare beloftes in Christus die
middelpunt van my lewe is.
Ons geloof is nie
in geloof nie, ons hoop is nie in hoop nie en ons liefde is nie gefokus op die
konsep van liefhê nie, maar op God wat die outeur van geloof, hoop en liefde
is.
"Die geloof kom dus deur die prediking wat 'n
mens hoor, en die prediking wat ons hoor, is die verkondiging van Christus."
Romeine 10:17 (NAV)
"En julle het die volheid in Hom wat die Hoof is
van alle owerheid en mag." Kolossense 2:10
"Die oog gevestig op Jesus, die Leidsman en
Voleinder van die geloof..." Hebreërs 12:2a
Die dag wat my
kind uit my huis uit stap die grootmenswêreld in wil ek hê hy moet verstaan dat
die anderste lewe van 'n dissipel van Jesus net moontlik is deur geloof, hoop
en liefde.
Bo alles wil ek
egter hê hy moet hierdie drie essensiële elemente van die geestelike lewe
aanhou vind in die wese en karakter van God en nie in homself nie. Ek wil hê hy moet weet waar om te gaan vol
maak.
