BOU MET GOD SE MATERIAAL

"Daarom, bemoedig mekaar en bou die een die ander op, soos julle ook doen." 1 Thessalonicense 5:11 

Alle mense het van tyd tot tyd bemoediging nodig.  God het ons geskep as interafhanklike wesens wat mekaar moet ophelp, aanspoor en versterk. Jy sal nooit jou skeppingsdoel kan uitleef as jy nie mense rondom jou het wat jou bemoedig wanneer jy dit nodig het nie.  Ons sien egter vandag dat mense toenemend meer venynig raak met mekaar en geoefen is daarin om ander af te breek in plaas daarvan om hulle op te bou.  Dit is werklik tragies.  Maar as ons bemoedig en opbou as dissipels van Jesus moet ons baie seker maak dat dit in waarheid is. 

Ons moet bemoedig in die lig van die evangelie.  Ons moet vir diegene wat ons bemoedig 'n ware prentjie van hulle situasie gee.  Ons moet met die Woord opbou.  Ons moet in Christus bemoedig.  Ons moet mekaar herinner aan die hoop wat die opstanding van Jesus gebring het en wat voltrek gaan word by Sy wederkoms.  Sien 1 Thessalonicense 4 verse 14 tot 18.  Ons moenie bemoedig soos die wêreld met hol motiveringsboodskappies wat eintlik maar net sielkundige "window dressing" is nie.  Dan doen ons meer skade as goed, want een of ander tyd bars dáái ballon.  

GOD SE RADIKALE PLAN VIR GEMEENTELEWE

Die briewe van die Nuwe Testament is hoofsaaklik geskryf aan gewone lidmate, nie leiers per se nie. Nuwe-Testamentiese leierskap is radikaal Christus-gesentreerd en ten volle lidmaat-gerig (Matt 23:8-12). Dit is daarop gerig om konstant en aanhoudend gelowiges vas te maak aan Christus as hul Hoofleier en om elkeen in die gemeente toe te rus om dissipelmakers te wees. Dit is tyd vir ons om op te hou om bloot te praat van die priesterskap van alle gelowiges en om dit werklik te begin toepas in ons gemeentelewe.

Dit verg natuurlik in baie gevalle’n groot paradigmaskuif in die konteks van ons huidige gemeentepraktyke, maar dit is van kardinale belang vir die uitvoering van God se plan vir Sy Gemeente. God se plan is eenvoudig en bedoel om deurdringend te wees: Élke lid van die liggaam toegerus, élke lid in die Woord, élke lid radikaal Christusgesentreerd en geaktiveer deur die evangelie en élke lid ’n dissipelmaker. Totdat ons hierdie spesifieke doelwit het, mis ons die merk heeltemal en mors kosbare tyd, selfs met al ons kerkprogramme, vergaderings, komitees, opleidingskursusse en dies meer.

AL DIE PLUSSE WAT WARE EENHEID EN VERHOUDING VERWOES

Dit is al die plusse wat ons by Jesus voeg wat eindelose probleme veroorsaak.  In plaas van om eksklusief te ywer vir die evangelie, die Persoon en Werk van Jesus, ywer ons soms vir soveel ander dinge ook.  Dit is nie moeilik om te toets in praktiese situasies nie.  Dissipels wat ‘n suiwer fokus op Jesus en ‘n onverdeelde lojaliteit aan Hom alleen koester, geniet die ware en universele gemeenskap van die Liggaam van Christus en kan dan rustig gesels oor verskillende goed in die Bybel waaroor hule mag verskil.  Wanneer daar egter ‘n Jesus plus fokus by een of albei dissipels is, vind ons omtrent nooit mekaar se harte nie. 

“Dat almal een mag wees net soos U, Vader, in My en Ek in U; dat hulle ook in Ons een mag wees, sodat die wêreld kan glo dat U My gestuur het.” Johannes 17:21

Jesus was die enigste soenoffer wat kon betaal vir ons sondes om ons verhouding met God te herstel.  Ons het gesterf saam met Hom.  Ons is begrawe saam met Hom.  Ons het opgestaan saam met Hom. Ons het opgevaar saam met Hom.  Ons sit in hemelse plekke saam met Hom.  Hy leef nou in ons as ons wysheid, geregtigheid, vrede, hoop en daaglikse krag.  Hy is die Een wat ons doop met die Heilige Gees en Hy is die Een wat die Vader vir ons openbaar.  “Ons is lede van sy liggaam, van sy vlees en van sy bene” (Efes. 5:30).  Hy is ook ons Bruidegom wat weer kom. 

Kortliks, Hy is ons alles.  Hy is waarlik ons lewe en bedoel om die middelpunt van al ons gesprekke te wees.  Ons toewyding en onverdeelde lojaliteit aan Hom gee vir ons onmiddellike toegang tot die hart van elke ander dissipel op aarde wat ook hierdie lojaliteit aan Jesus alleen koester en daarom Sy Woord liefhet en bewaar.  Ongeag kultuur, ras, kleur, geslag, nasionaliteit; dit is ons onverdeelde lojaliteit aan Hom wat ons harte verbind!  Ons kan verskil oor nie-essensiële dinge in die Bybel, maar as ons lojaliteit en fokus suiwer is, gaan ons by mekaar se harte uitkom.  Waarvoor ywer ons werklik?  Is ons fokus suiwer?  Is die leringe waaraan ons vashou en waarvoor ons ywer ‘n resultaat van ons fokus op Jesus alleen of is dit die vrug van ons eie intellektuele of emosionele voorkeure en afkeure of dalk tradisie en groepsdruk in ons gemeente of denominasie? 

Laat die Heilige Gees toe om jou hart te ondersoek en wees braaf genoeg om die plusse te laat gaan wat dalk subtiel ingesluip het in jou hart.  As dit van die Here was sal Hy dit wel weer onder jou aandag bring.  Maar hierdie keer vanuit ‘n suiwer Jesus fokus en vir die regte redes.

GENEESDE VERHOUDINGS IN DIE AANGESIG VAN JESUS

Ons verhoudingsprobleme ontstaan wanneer ons wegkyk van die "aangesig van Jesus" en op 'n ander basis verhouding probeer bou.  Maar daar is kosbare herstel van verhoudings en verstommende versoeningspotensiaal wanneer ons mekaar begin sien "in die aangesig van Jesus". 

Die woord "aangesig" kom net drie keer voor in die Nuwe Afrikaanse Vertaling, maar meer as 700 keer in die Ou Afrikaanse Vertaling. Alhoewel dit 'n woord is wat ons nie vandag meer gebruik nie is daar tog vir my iets aan hierdie woord wat die idee van verhoudingsintimiteit pragtig uitdruk. 

In die Ou Afrikaanse Vertaling word dit nie net gebruik om ons verhouding met God te beskryf nie, maar ook ons verhouding met mekaar.  Dit spreek van versoening, van nabyheid, van harte wat kontak het met mekaar, van 'n intieme kennis en 'n begeerte om nog beter te ken.  Die hele boodskap van die evangelie gaan daaroor dat ons God slegs kan ken "in die aangesig van Jesus Christus".  Die Heilige Gees openbaar die Persoon en Karakter van Jesus vir ons in die evangelie en dit bring oombliklik 'n verhoudingskennis van God.

"Want God wat gesê het dat daar uit duisternis lig moet skyn—dit is Hy wat in ons harte geskyn het om die verligting te bring van die kennis van die heerlikheid van God in die aangesig van Jesus Christus." 2 Korinthiërs 4:6 

In die "aangesig van Jesus" leer ons nie net die Vader ken nie, maar word daar ook op 'n wonderbaarlike wyse 'n weg vir ons oopgemaak om mekaar "in Christus" te ken.

"Maar nadat ons, broeders, ‘n kort tydjie van julle geskeie was—in persoon, nie met die hart nie—het ons met groot verlange ons des te meer beywer om julle aangesig te sien." 1 Thessalonicense 2:17 

Ek nooi jou vandag uit om na die mense om jou te begin kyk in die lig van die Persoon en verlossingswerk van Jesus, m.a.w. in die lig van Sy aangesig.

DAAGLIKSE AFHANKLIKHEID VAN DIE HEILIGE GEES

"En die gemeentes deur die hele Judéa en Galiléa en Samaría het vrede gehad; en terwyl hulle opgebou is en gewandel het in die vrees van die Here en die vertroosting van die Heilige Gees, het hulle vermeerder." Handelinge 9:31 

'n Mens kan nie met aandag deur die boek Handelinge lees sonder om diep beïndruk te word deur die antieke gemeentes se kinderlike afhanklikheid van die Heilige Gees nie.  Vir hulle was die werklikheid van Jesus se teenwoordigheid by hulle en in hulle nie net 'n teorie nie.  Die uitstorting van die Heilige Gees was vir hulle die groot gebeurtenis wat alles op hierdie aarde verander het.  Om te "wandel deur die Gees" was nie 'n onderwerp vir die volgende Bybelstudie nie, maar hulle daaglikse belewenis.  Dit was ondenkbaar om nie die Heilige Gees te vertrou vir elke behoefte aan wysheid, krag en oorwinning in die daaglikse lewe nie. 

Is jý bewus van die onmiddellike teenwoordigheid en werking van die Gees in jou lewe?  Dit begin alles met geloof.  Ons moet onwrikbaar glo dat die Trooster en Helper gegee is vir ons om daagliks in die krag en karakter van Jesus te kan leef op hierdie aarde.  Elke belofte wat vir ons gegee is in die Bybel kan net gerealiseer word deur die bediening van die Heilige Gees.  Die Woord en die Gees werk saam om Jesus in die hier-en-nou van ons lewens 'n werklikheid te maak.

REALISTIES OPTIMISTIES

Die wêreld se optimisme is uiterlik, kunsmatig en totaal uit voeling met die gevallenheid van die huidige skepping en die oordeel wat wag vir almal wat nie die knie wil buig vir Jesus Christus nie.

"Maar die dag van die Here sal kom soos ‘n dief in die nag, waarin die hemele met gedruis sal verbygaan en die elemente sal brand en vergaan, en die aarde en die werke wat daarop is, sal verbrand." 2 Petrus 3:10 

"En aan julle wat verdruk word, verligting te gee saam met ons in die openbaring van die Here Jesus uit die hemel met sy magtige engele  in vuur en vlam, wanneer Hy wraak uitoefen op die wat God nie ken nie en op die wat aan die evangelie van onse Here Jesus nie gehoorsaam is nie." 2 Thessalonicense 1:7-8 

As dissipels van Jesus het ons nodig om vir ongelowiges 'n realistiese prentjie te gee van die lewe op 'n gevalle en gebroke planeet.  Daar is byvoorbeeld geen verlossing en vreugde vir enigiemand voordat hulle nie eers treur oor hulle sonde en dan wegdraai daarvan nie.

"Salig is die wat treur, want hulle sal vertroos word." Mattheüs 5:4 

Konsekwent regdeur die Bybel word optimisme net 'n moontlikheid wanneer 'n mens eers God se diagnose van ons gevallenheid aangehoor en aanvaar het en dan Sý verlossingsplan omhels het.  Daarom faal die wêreld se optimisme altyd tragies en bring uiteindelik totale wanhoop en verwoesting.  Ons het 'n verantwoordelikheid voor God om die valse en oppervlakkige optimisme van die wêreld te ontbloot en daarteenoor die egte en ewigdurende optimisme van die Bybel te verkondig. 

God se plan en uitweg staan lynreg teenoor die van die wêreld.  Ons kan nie en durf nie die twee probeer versoen nie.  Ons durf nie die opstandingslewe aanbied sonder 'n kruis nie.  Selfs nadat ons wedergebore is, kom vreugde aan die ander kant van sterf aan myself, liefde eers wanneer ek my eie goedgunstigheid en welwillendheid opgegee het en Christus se liefde in my ontdek het, ware hoop eers wanneer ek geen meer hoop in die natuurlike en tydelike het nie, maar my oë gerig het op die geestelike en ewige werklikheid van die koninkryk wat kom. 

Het ons generasie van gelowiges dalk begin om die wêreld se optimisme te koop en ons kosbare Bybelse optimisme te versaak?  Is ons "positiwiteit" nie maar dikwels die van die wêreld nie?  Is dit nie dalk hoekom ware, diepgaande  vreugde en hoop wat die storms van die lewe in werklikheid kan trotseer so skaars is onder ons nie?  Martyn Lloyd-Jones, 'n groot prediker van die vorige eeu, het in sy tyd al gesê "we are far too bright and breezy today".

DIE "EVANGELIE" WAT VAN DIE KRUIS 'N VOETNOTA MAAK

Ons generasie se verdraaide siening van God se liefde bring die ware evangelie ernstig in gedrang.  Die manier wat mense vandag praat oor die evangelie en die liefde van God laat mens wonder of ons generasie regtig nog verstaan dat God sonde gestraf het in Christus.  God verander nie.  Hy het nie verander van hierdie Ou Testamentiese God wat net wou straf na die Nuwe Testamentiese God wat net wil liefhê nie.  Die keuse is nie wraak óf liefde nie.  God se wraak teen sonde het gekulmineer in die verbryseling van Sy eie Seun. 

"Maar dit het die HERE behaag om Hom te verbrysel..."  Jesaja 53:10 

Dit is waar die liefde inkom en dit is baie groter as vandag se vals idee van God se liefde.  God het nie en sal ook nooit Sy heiligheid opgee om ruimte te maak vir Sy liefde nie.  Sy liefde en heiligheid staan nie teenoor mekaar nie.  God het nie sonde oorgesien nie.  Hy het dit gestraf in Christus.  'n "Evangelie" wat mense onder die indruk bring dat God uit 'n nuutgevonde liefde sonde oorgesien het en nou vir die hele wêreld vergifnis aanbied, maak van die kruis 'n blote voetnota.  Dit is 'n "evangelie" wat nie kan red nie.  Dit is ook die soort "evangelie" wat in ons tyd ruimte begin maak vir sonde en 'n hele wêreld van grys skep wat hordes mense verwar omdat hulle nie meer weet wat dan nou reg of verkeerd is nie. 

Die ware evangelie leer dat God die sonde gestraf het in Sy Seun en dat ons "saam met Christus" gesterf het vir die mag van sonde en nou kan leef in 'n opstandingslewe "saam met Christus".  Op grond van hierdie evangelie kan ons dan duidelik onderskei tussen lig en duisternis en begin om lewens van ware heiligheid en geregtigheid te leef.

"En dit is die verkondiging wat ons van Hom gehoor het en aan julle verkondig: God is lig, en geen duisternis is in Hom nie." 1 Johannes 1:5 

"So moet julle ook reken dat julle wel vir die sonde dood is, maar lewend is vir God in Christus Jesus, onse Here." Romeine 6:11