DIE HOOGSTE WAARDE EN GROOTSTE VREUGDE VAN WARE DISSIPELS

Dit is absoluut verstommend om te besef dat ons God mag ken en dat Hy dit deur die evangelie moontlik gemaak het dat ons Hom kan ken.  Vir ware dissipels van Jesus gaan die lewe oor die ken van God.  Vir dissipels is die ken van God nie 'n "eendag in die hemel" ding nie, maar 'n hier-en-nou werklikheid.

Christenskap gaan nie oor die onkenbare God daar vêr wat my help om 'n beter lewe op aarde te hê en my darem in die ewigheid hierna ook kans sal gee om Hom te ken nie. Reg deur die eeue het mense in die evangelie ontdek dat ons God nou-al kan ken en dat dit reeds in hierdie lewe op aarde ons hoogste waarde en grootste vreugde kan wees.

"Only to sit and think of God,   

Oh what a joy it is!

To think the thought, to breathe the Name;  

Earth has no higher bliss."

Frederick Faber

Die volgende is 'n paar van my gunsteling tekste oor "die ken van God" (meer as net "kennis óór Hom").  Gaan dink bietjie oor tekste wat vir jou kosbaar is m.b.t. hierdie wonderlike onderwerp.

"U sal my die pad van die lewe bekend maak; versadiging van vreugde is voor u aangesig, lieflikhede in u regterhand, vir ewig." Psalm 16:11 

"Maar ek sal u aangesig in geregtigheid aanskou; ek sal versadig word met u beeld as ek wakker word." Psalm 17:15

"Een ding het ek van die HERE begeer, dit sal ek soek: dat ek al die dae van my lewe mag woon in die huis van die HERE, om die lieflikheid van die HERE te aanskou en te ondersoek in sy tempel." Psalm 27:4

"Al die nasies wat U gemaak het, sal kom en hulle voor u aangesig neerbuig, Here, en hulle sal u Naam eer; want U is groot en doen wonders, U alleen is God.  Leer my, HERE, u weg: ek sal in u waarheid wandel; verenig my hart tot die vrees van u Naam." Psalm 86:9-11

"En die een het die ander toegeroep en gesê: Heilig, heilig, heilig is die HERE van die leërskare. Die hele aarde is van sy heerlikheid vol!" Jesaja 6:3 

"Niemand het ooit God gesien nie; die eniggebore Seun wat in die boesem van die Vader is, dié het Hom verklaar." Johannes 1:18

"En dit is die ewige lewe, dat hulle U ken, die enige waaragtige God, en Jesus Christus wat U gestuur het." Johannes 17:3 

"Wat van die begin af was, wat ons gehoor het, wat ons met ons oë gesien het, wat ons aanskou het en ons hande getas het aangaande die Woord van die lewe— en die lewe is geopenbaar, en ons het dit gesien, en ons getuig en verkondig aan julle die ewige lewe wat by die Vader was en aan ons geopenbaar is— wat ons gesien en gehoor het, verkondig ons aan julle, sodat julle ook gemeenskap met ons kan hê; en ons gemeenskap is met die Vader en met sy Seun, Jesus Christus. En ons skrywe hierdie dinge aan julle, sodat julle blydskap volkome kan wees." 1 Johannes 1:1-4

"Ja waarlik, ek ag ook alles skade om die uitnemendheid van die kennis van Christus Jesus, my Here, ter wille van wie ek alles prysgegee het en as drek beskou, om Christus as wins te verkry." Filippense 3:8

"Sodat ek Hom kan ken en die krag van sy opstanding en die gemeenskap aan sy lyde terwyl ek aan sy dood gelykvormig word." Filippense 3:10