DIE KONINKRYK VAN GOD IN DIE 27 BOEKE VAN DIE NUWE TESTAMENT

 "En hierdie evangelie van die koninkryk sal verkondig word in die hele wêreld tot ‘n getuienis vir al die nasies; en dan sal die einde kom." Mattheüs 24:14

In Mattheüs sien ons die outoriteit van die Koning, in Markus Sy diensbaarheid, in Lukas Sy volmaakte mensheid en in Johannes Sy verborge lewe in die "boesem van die Vader" wat manifesteer in 'n onoorwinlike heerskappy van Goddelike liefde op aarde.  In Handelinge sien ons al vier kenmerke van die Koning se lewe sigbaar in Sy dissipels en in heerskappy ten spyte van opposisie. 

Romeine openbaar dat die geregtigheid wat God behaag net in die Koning te vinde is. 1 Korinthiërs wys vir ons dat Sy lewe in ons alle probleme in gemeentes kan oorkom. In 2 Korinthiërs is bedienaars van die evangelie, ten spyte van baie lyding, gewaarborg dat die koninkryk van God uiteindelik sal triomfeer oor alle teenstand.  In Galasiërs heers die geregtigheid van die koninkryk oor wettisisme en in Efesiërs word ons herinner dat ons as liggaam van Christus die volheid is van die Koning wat "alles in almal vervul".  In Filippense is ons blydskap oor die lewe van die Koning in ons die sleutel tot 'n diensbare en oorwinnende wandel tot op die einde van ons lewenspad.  In Kolossense heers die pre-eminensie van die Koning oor sinkretisme, asketisme en mistisisme en word ons opgeroep om met hart en siel en wese te fokus op ons heerskappy saam met Hom in die hemele (3:1-3) sodat ons op aarde 'n heilige lewe kan lei.

In 1 en 2 Thessalonicense is ons visie op die terugkeer van die Koning in volle heerlikheid die sleutel tot 'n oorwinnende koninkrykslewe in die hede.  In 1 en 2 Timotheüs en Titus sien ons dat die liefdesheerskappy van die Koning in 'n "rein hart, 'n goeie gewete en ongeveinsde geloof" (1 Tim. 1:5) altyd sal lei tot 'n ordelike, geseënde en vrugbare bediening en gemeentelewe.  In Filémon sien ons dat barmhartigheid, genade en vergifnis in Christus die basis is van gesonde verhoudings in die koninkryk en dat dit ongekende heerlikheid en blydskap kan bring te spyte van groot foute en sondes.

Hebreërs openbaar weereens die pre-eminensie van die Koning en Sy Nuwe Verbond en roep ons op om nuut te dink oor alles in die lig van die finale woord van God in die Seun (1:1-2).  Jakobus daag ons uit om 'n egte geloof te hê en nie toe te laat dat enige area van ons lewens onaangeraak bly deur die heerskappy van die Koning nie.  1 Petrus leer ons dat die koninkrykslewe in die hier-en-nou baie vervolging en lyding insluit, maar dat ons bemoedig moet word deur die feit dat ons Koning se oorwinning in Sý nederige lewe op aarde oor die opposisie van godsdiens en bose mense ook ons oorwinning kan wees in die hede. 

2 Petrus en die boek Judas leer ons dat baie valse leraars en leringe die Koning en sy koninkryk aanvat, maar dat ons oor dit alles kan heers as ons sterk staan in die suiwer boodskap van die evangelie van die koninkryk.  Die drie briewe van Johannes wys ons dat die lewe, lig en liefde van die Koning in ons onderskei moet word van alle alternatiewe filosofieë en leringe wat kwansuis dieselfde kwaliteite produseer.  En laastens sien ons in die boek Openbaring dat die Lam op die Troon ten spyte van geweldige teenstand van vyande van die kruis steeds heers in die hier-en-nou van ons lewens en dat al Sy vyande goed moet besef dat Hy reg staan om alle rebellie teen Sy heerskappy te verpletter onder Sy voete.

"Waarom woel die nasies en bedink die volke nietige dinge?" Psalms 2:1   

"Dan sal Hy hulle aanspreek in sy toorn, en in sy grimmigheid sal Hy hulle verskrik: Ek tog het my Koning gesalf oor Sion, my heilige berg." Psalms 2:5-6

"Wees dan nou verstandig, o konings; laat julle waarsku, o regters van die aarde! Dien die HERE met vrees, en juig met bewing. Kus die Seun, dat Hy nie toornig word en julle op die weg vergaan nie; want gou kan sy toorn ontvlam. Welgeluksalig is almal wat by Hom skuil!" Psalms 2:10-12