SKUIF JOU FOKUS NA DIE ONSIGBARE

“Want ons ligte verdrukking wat vir ‘n oomblik is, bewerk vir ons ‘n alles oortreffende ewige gewig van heerlikheid; omdat ons nie let op die sigbare dinge nie, maar op die onsigbare; want die sigbare dinge is tydelik, maar die onsigbare ewig.”  2 Kor. 4:17-18  

Van aardse heerlikheid na hemelse heerlikheid, van die sigbare na die onsigbare, van die tydelike na die ewige.  Dit is die oproep van hierdie twee kragtige verse en dit is super-aktueel, omdat ons lewe in ‘n tyd waar alles gaan oor die hier-en-nou.   In vergelyking met die meeste ander mense sou ons sekerlik nie Paulus se verdrukking beskryf het as “ligte” verdrukking nie!  Hier is net ‘n kort uittreksel uit sy lewe: “Drie maal is ek met stokke geslaan, een maal is ek gestenig, drie maal het ek skipbreuk gely, ‘n nag en ‘n dag het ek op die diepwater deurgebring—  dikwels op reis, in gevare van riviere, in gevare van rowers, in gevare van my volk, in gevare van die heidene, in gevare in die stad, in gevare in die woestyn, in gevare op see, in gevare onder valse broeders;  in arbeid en moeite, in slapelose nagte dikwels, in honger en dors, dikwels sonder ete, in koue en naaktheid.  Behalwe dit alles my daaglikse bekommernis, die sorg vir al die gemeentes” (2 Kor. 11:25-28). Hoekom beskryf hy dan sy verdrukking as ‘n “ligte verdrukking”?  Want Paulus se oë was nie op die sigbare en die tydelike gerig nie, maar op die ewige.  Paulus het te alle tye die heerlikheid van Christus aanskou (2 Kor. 3:18).  Hoe lyk dit met my en jou?  Paulus was ‘n mens net soos ek en jy.  As hy in geloof kon uitstyg bo sy omstandighede deur sy fokus te skuif na die onsigbare en die ewige kan ons ook.  Geloof leef hier op aarde al in die lig van die hemelse heerlikheid, want geloof word nie beweeg deur die sigbare nie, maar deur die ewige Woord van God.  Boonop sien geloof daar is ‘n veel groter heerlikheid wat kom en skenk ons sodoende ‘n onuitspreeklike blydskap te midde van die moeilikste omstandighede denkbaar.

VOLMAAKTE OMSTANDIGHEDE OF VOLMAAKTE WIL?

"En word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is." Romeine 12:2

Die wêreld is gedurig op soek na die volmaakte omstandighede, daardie ontwykende plek van onbeperkte bevrediging waar daar boonop niks onvoorspelbaar kan gebeur nie. Dit is in werklikheid 'n soektog wat nooit op hierdie gevalle planeet suksesvol kan wees nie. Daar is nie een of ander verlore kaart na hierdie Shangri-La nie. Wat ons wel kan vind is die volmaakte wil van God. Dit vind ons net "in Christus", Hy in wie "alle dinge stand hou" (Kol. 1:17).  Dit is 'n plek van vrede en blydskap te midde van omstandighede wat soms baie vêr van volmaak is! Hierdie plek vind 'n mens net as jy éérs jou rug gekeer het op die wêreld se futiele soektog na volmaakte omstandighede.

Wat van jou? Soek jy dalk God se wil én volmaakte omstandighede? Miskien dink jy God se wil ís volmaakte omstandighede op hierdie aarde. Dit is nie wat die Bybel leer nie. In die hier en nou is daar wel innerlike vrede en blydskap binne God se wil. Om in die voetspore van Jesus te volg is die mees geseënde lewe denkbaar. Boonop is daar baie kosbare beloftes van volmaakte omstandighede in die "nuwe hemel en aarde" (2 Pet. 3:13) waarheen ons oppad is. Moenie twee paaie probeer loop nie.  Gee liewer jouself oor aan God se volmaakte wil. Dit is die pad van wysheid wat Jesus toeganklik gemaak het vir alle mense.

MOOIER, SLIMMER, STERKER EN RYKER

Die wêreld is gedurig besig met 'n kompetisie om uit te vind wie die mooiste, die slimste, die sterkste, die rykste en die mees talentvolle is. Dit is 'n kompetisie waaraan dissipels van Jesus nooit hoef deel te neem nie.

"Laat niemand dan op mense roem nie, want alles behoort aan julle; of dit Paulus is of Apollos of Céfas of die wêreld of lewe of dood of teenswoordige of toekomstige dinge — alles behoort aan julle." 1 Kor. 3:21-22

As jy ooit minderwaardig (of meerderwaardig) voel omdat jy jouself met ander mense vergelyk, stop vir 'n oomblik en dink oor wat jy in Jesus ontvang het. As alles in werklikheid reeds aan jou behoort, is daar geen prys, prestasie, roem of rykdom op hierdie aarde wat iets daarby kan voeg nie. Ware rykdom word gevind in 'n lewe wat die liefde van Jesus vertoon en onbaatsugtig gee van jouself.  Sonder hierdie liefde is ons niks en het ons niks, selfs al is die hele wêreld vreeslik beïndruk met ons (1 Kor. 13:1-3).

GELOOF OFFER ALLES

“Toe sê Hy: Neem jou seun, jou enigste, wat jy liefhet, Isak, en gaan na die land Moría en offer hom daar as brandoffer op een van die berge wat Ek jou sal aanwys.”  Gen. 22:2 

“En Hy sê vir almal: As iemand agter My aan wil kom, moet hy homself verloën en sy kruis elke dag opneem en My volg.”  Luk. 9:23 

“Ek vermaan julle dan, broeders, by die ontferminge van God, dat julle jul liggame stel as ‘n lewende, heilige en aan God welgevallige offer dit is julle redelike godsdiens.”  Rom. 12:1

Geloof antwoord “dit is waar” op die rykdom van al die verlossingsvoordele wat sonder verdienste deur die Vader op ons uitgestort is in Christus.  Geloof is oorweldig deur so ‘n groot liefde.  Geloof weet dat daar geen einde is aan die barmhartigheid en genade in die Vaderhart van God nie.  Geloof is onomkeerbaar beïndruk deur hierdie Vader van onse Here Jesus Christus.  Dáárom offer geloof alles en doen dit met ‘n oorgawe wat totaal onverstaanbaar is vir die wat nie glo nie.  Aan die ander kant is ‘n halfhartige offer ‘n aanduiding van ‘n onvoldoende geloof. 

GELOOF (IS) GEHOORSAAM

“Deur die geloof het Abraham, toe hy geroep is, gehoorsaam weggetrek na die plek wat hy as ‘n erfenis sou ontvang; en hy het weggetrek sonder om te weet waar hy sou kom.”  Heb. 11:8 

Op alles wat God in Sy Woord sê, antwoord geloof “dit is waar”!  Dit is die fondasie van Bybelse geloof.  Maar ‘n fondasie is nie net daar om mooi te lyk of te beïndruk nie.  ‘n Fondasie is bedoel om op gebou te word en hierdie bouwerk het in geestelike terme alles te doen met gehoorsaamheid.  God openbaar homself aan ons as die mees betroubare Persoon in die heelal.  Daarom kan ons sy Woord glo.  Ons geloof is eerstens in wie Hý is, dan kan ons met groot vrymoedigheid en vreugde onwrikbaar glo en bely wie ons ín Hom is.  Net vanuit daardie plek van innerlike sekuriteit word gehoorsaamheid ‘n werklikheid.  Hierdie gehoorsaamheid is ‘n geloofsgehoorsaamheid en is iets heeltemal anders as ek wat probeer om uit die krag van my eie wil ‘n getroue dissipel te wees.  Abraham het “gehoorsaam weggetrek na die plek wat hy as ‘n erfenis sou ontvang”, want Hy het vertroue gehad in die Een wat hom geroep het en hy het geweet dat sy eie identiteit onlosmaaklik verbind was aan die wese en karakter van ‘n enige en almagtige God (Deut. 6:4).  Abraham se lewe was nie net ‘n voorbeeld vir ons nie, maar ‘n oproep tot dieselfde soort geloof wat moet lei tot dieselfde sóórt gehoorsaamheid, al verskil die detail van ons lewens en gehoorsaamheid in baie opsigte van syne.

GELOOF ANTWOORD "DIT IS WAAR"

"Want ons wandel deur geloof en nie deur aanskouing nie." 2 Kor. 5:7

Die Woord sê 'jy is 'n nuwe skepsel in Christus'. Geloof antwoord 'dit is waar', selfs al voel dit nie vir jou so nie. Die Woord sê jy is 'dood vir die sonde'. Geloof antwoord 'dit is waar', selfs al lyk dit nie nou so nie. Die Woord sê 'jy is meer as 'n oorwinnaar in Christus'. Geloof antwoord 'dit is waar', selfs al skree jou emosies 'mislukking'! Die Woord sê jy sit 'saam met Christus in hemelse plekke'. Geloof antwoord 'dit is waar', selfs al voel dit vir jou of die gevalle aarde jou vashou en oorweldig. Die Woord sê jy 'het die volheid in Christus'. Geloof antwoord 'dit is waar', selfs al voel jy so leeg soos 'n welsynsblikkie by Pick 'n Pay. Neem enige "in Christus" waarheid in die Woord en antwoord 'dit is waar', want God sê so. Dit is die begin van die deurbrake in jou lewe.