"MAAK DOOD EN LÊ AF", NIE "PROBEER JOU BES EN GOD DOEN DIE RES" NIE!

Die Nuwe Testament se benadering tot heiligmaking (heiliging/lewensverandering) is  radikaal anders as die algemene idees wat oningeligte dissipels en soms hele gemeentes dikwels handhaaf.  

Ons word nie geroep om net uit dankbaarheid, omdat ons sondes vergewe is, nou ons bes te probeer om beter mense te wees nie.  En dan te vertrou dat die Here ons darem net so 'n hupstootjie sal gee om dit bietjie makliker te maak vir ons nie.

Ons word eerder opgeroep om te besef dat ons reeds in Christus gesterf het vir die sonde (Rom. 6:2, 11) en dat ons in daardie oorwinning van Christus sondedade en sondepatrone kan "doodmaak" en "aflê".  Heiliging op aarde vind dus plaas vanuit 'n hemelse posisie en 'n stryd wat reeds deur Jesus gewen is (Kolossense 3:1-4).

"Maak dood dan julle lede wat op die aarde is, naamlik hoerery, onreinheid, hartstog, slegte begeertes en gierigheid, wat afgodediens is." Kolossense 3:5

"Maar nou moet julle ook dit alles aflê, naamlik toorn, woede, boosheid, laster, skandelike taal uit julle mond." Kolossense 3:8

Hierdie soort heiligingstaal is egter  so vreemd vir ons as ons nog nooit werklik mooi opgelet het na die werkwoorde in die Nuwe Testament nie dat dit 'n groot kopskuif verg om dit jou eie te maak en heeltemal anders te begin dink oor hoe God regtig mense se lewens verander. 

Laat vaar geheel en al jou eie idees, populêre sieninge, motiveringsfoefies en sielkundige truuks wat so baie belowe, maar nooit langtermyn verandering kan bring nie.  Omhels daarenteen met jou hele hart en siel die Bybelse benadering van "dood vir die ou skepping" en "lewend vir die nuwe skepping" IN CHRISTUS!  Dit is die enigste vaste grond; die res is dryfsand.

HEILIGING BEGIN NIE OP AARDE NIE, DIT BEGIN IN DIE HEMEL

  Veranderde lewens in Bybelse terme begin altyd by 'n nuwe fokus.  Dit begin in die hemele waar ons nou-al "saam met Christus sit" (Efes. 2:6).

 In Kolossense 2 vers 20 sien ons die volgende verstommende stelling van Paulus: "waarom...asof julle nog in die wêreld lewe...".  Die ESV sê: "why, as if you were still alive in the world...".  Hy sê in effek: "Waarom onderwerp julle jul aan aardse benaderings tot heiliging (vormgodsdiens) as julle in werklikheid nie meer behoort aan hierdie aardse en gevalle skepping nie"?  En dan gaan hy aan in die volgende hoofstuk om hierdie dringende appél te maak op dissipels:

 "As julle dan saam met Christus opgewek is, soek die dinge daarbo waar Christus is en aan die regterhand van God sit. Bedink die dinge wat daarbo is, nie wat op die aarde is nie." Kolossense 3:1-2

 Verder aan in die hoofstuk begin hy om te praat oor die detail van heiliging, maar hy praat nooit in sy briewe oor die detail van heiliging (heiligmaking/veranderde lewens/transformasie) voordat hy nie seker gemaak het dat ons fokus geskuif het van die aardse na die hemelse nie.  Dit gaan dus nie oor 'n vergeefde Adam wat probeer om homself te verander nie, maar oor 'n nuwe mens in Christus wat leer om in geloof te leef vanuit die nuwe lewe in Christus.

 Is jy moeg vir al die mislukte pogings om te verander via vormgodsdiens en wettisisme (self-heiliging)?  Miskien is dit tyd om jou hele fokus te verskuif en met die oë van jou hart te sien dat God geen ander plan vir veranderde lewens het as Sy ewige plan "in Christus" nie.

 Gaan lees Kolossense 2 en 3 met aandag en vra die Here om jou oë oop te maak vir Sý meesterplan in Christus om mense, verhoudings, lewens, gemeentes en hele gemeenskappe te verander.

GEESTELIKE ROWERS

 'n Geestelike rower is iemand wat nie die genoegsaamheid van Christus vir sy eie lewe aanvaar nie, maar dan gaan hy verder en beroof ook ander mense van hulle vreugde in die volheid van Christus (Kol. 2:9-10).

"Laat niemand julle van jul prys beroof nie, al sou hy behae hê in nederigheid en verering van die engele en indring in wat hy nie gesien het nie, en sonder oorsaak opgeblase wees deur sy vleeslike gesindheid, en nie vashou aan die Hoof nie, uit wie die hele liggaam deur die gewrigte en verbindinge ondersteuning ontvang en saamgebind word en so met goddelike groei groot word." Kolossense 2:18-19

Paulus gee vir die gelowiges in Kolosse 'n opdrag om onder geen omstandighede toe te laat dat enigiemand hulle beroof van die heerlikheid wat 'n eenvoudige geloof in Jesus alleen (Jesus plus niks) bring nie.

"Vir wie julle, al het julle Hom nie gesien nie, tog liefhet; in wie julle, al sien julle Hom nou nie, tog glo en julle verbly met ‘n onuitspreeklike en heerlike blydskap."  1 Petrus 1:8

Die nederigheid waarvan daar in Kolossense 2 vers 18 gepraat word is natuurlik 'n valse nederigheid. In die konteks verwys dit veral na die godsdienstige houding wat dissipels wat staan op die vrymoedigheid waarmee ons God in Christus mag nader en die volheid wat ons in Hom het, as trots en arrogant beskou. Hierdie godsdienstiges voel dat hulle baie nederig is as hulle nie op die genoegsaamheid van die evangelie staan nie, maar eerder op selfvernedering en 'n mistiese en ongedefinieërde spiritualiteit wat fokus op engele en visioene.

Natuurlik moet ons bely dat ons niks in onsself is nie, maar in Christus hét ons die volheid ontvang.  Dit is vaste grond onder ons voete en ons hoef nie verskoning te vra daarvoor nie.  Die ware arrogantes is diegene wat trots is op hulle eie nederigheid en roem in hulle eie geestelikheid in plaas van op Jesus en Sý verlossingswerk.

"Daarom, soos geskrywe is: Die wat roem, moet in die Here roem." 1 Korinthiërs 1:31

Daar is geweldig baie geestelike intimidasie vandag. Moenie toelaat dat enigiemand jou intimideer en "ongeestelik" laat voel omdat jy staan op die eenvoud van geloof in Jesus nie (2 Kor. 11:2-3).  Vir seker moet ons nooit ophou om 'n dieper en dieper kennis van Jesus na te jaag nie (Filippense 3:7-10), maar dit bly geloof van begin tot einde; nie self-verbetering via mistisisme, ritualisme, wettisisme, askese (asceticism) of enige kombinasie van die vier nie. 

LAAT STAAN DIE SKADUWEE, DIE WERKLIKHEID IS HIER!

"Daarom moet julle nie dat iemand vir julle voorskrywe wat julle moet eet en drink nie, of dat julle die jaarlikse feeste of die nuwemaansfees of die sabbatdag moet vier nie. Dit is alles maar net die skaduwee van wat sou kom; die werklikheid is Christus." Kolossense 2:16-17

Vormgodsdiens het 'n eindelose fassinering met skaduwees en uiterlike dinge.  Die wortel van hierdie probleem is waarskynlik die onvermoë om weg te kyk van jouself om die volkomenheid dan in Christus te vind.  Die boodskap van geloof alleen is te eenvoudig vir jou.  "Dit kan nie so ongekompliseerd wees nie!"

Jy bly besig met self-heiligingsprogramme en projekte om jou ervaring op standaard te bring.  Nog 'n ritueel, nog 'n liturgie, nog 'n metodiek; hou net aan probeer en een of ander tyd gaan jy geestelike vervulling en satisfaksie kry wanneer God uiteindelik tevrede is met jou diens aan Hom (godsdiens!).

Daarteenoor, die evangelie.  God het alles kant en klaar afgehandel in Sy Seun.  God is tevrede met Sy Seun. Sy Seun is die vervulling van alle skaduwees en tipes in die Ou Testament.  Wat bly oor?  Geloof.  Glo jy dit of glo jy dit nie? 

As jy werklik glo dat Jesus genoeg is en dat jy verenig is met Sý volheid en volmaaktheid (Kol. 2:9-10), sal al hierdie eksterne dinge van vormgodsdiens van jou afval soos herfsblare van 'n boom.  Dan eers sal jy begin beleef wat die beteken om God in "gees en waarheid" te aanbid (Joh. 4:23) en om deel te hê aan die volmaakte verhouding tussen die Vader en die Seun (Joh. 17:24; 1 Kor. 1:9).

"U sal my die pad van die lewe bekend maak; versadiging van vreugde is voor u aangesig, lieflikhede in u regterhand, vir ewig." Psalms 16:11

GLO JY WAT JY GLO?!

Ek het 'n tannie gehad wat lief was om vir mense te vra: "glo jy wat jy glo"?  Daarmee wou sy jou dieper laat dink en jou, indien nodig, skuif van bloot intellektuele en gemakstoel geloofsoortuigings na 'n vaste vertroue in die evangelie wat in staat sou wees om storms te weerstaan en oorwinnend aan die ander kant uit te kom.

"Soos julle dan Christus Jesus, die Here, aangeneem het, wandel so in Hom, gewortel en opgebou in Hom en bevestig in die geloof, soos julle geleer is, terwyl julle daarin oorvloedig is in danksegging.  Pas op dat niemand julle as ‘n buit wegvoer deur die wysbegeerte en nietige misleiding nie, volgens die oorlewering van die mense, volgens die eerste beginsels van die wêreld en nie volgens Christus nie."  Kolossense 2:6-8

Die gelowiges in Kolosse het begin om diep te gaan skep by ander fonteine van sogenaamde "wysheid" om hulle geloof in Jesus as't ware aan te vul.  Paulus vermaan hulle om nie weg te beweeg van dit wat hulle aanvanklik geglo en beleef het in Christus nie. Hulle moes eerder hulle geestelike wortels dieper in Hom laat ingroei en toelaat dat die Heilige Gees hulle opbou op daardie vaste fondasie. 

Daar is so 'n groot verskeidenheid lewensfilosofieë, wêreldbeskouings en boonop vals of misplaaste teologieë wat die rondtes doen vandag dat ons meer as ooit vantevore moet glo wat ons glo en staan waar ons staan.   

Moenie dat enigiets jou skuif of beweeg nie.  Geen ander lewensfilosofie het die kruis en opstanding van Jesus (historiese feite) as fondasie nie.  Jy kan maar jou volle gewig en al jou omstandighede swaar laat leun op hierdie fondasie.  Dit sal nooit maar nooit wankel nie.  Hierdie fondasie is ook nie net 'n wêreldbeskouing nie, dis 'n Persoon!

DIE GEHEIM IS UIT, MAAR IS DIT IN JOU HART GEOPENBAAR?

 "Dit is die geheimenis wat eeue en geslagte lank verborge was, maar wat nou geopenbaar is aan die mense wat aan Hom behoort.  God het besluit om aan hulle bekend te maak hoe seënryk en heerlik hierdie geheimenis vir die nasies is. Die inhoud daarvan is: Christus is in julle, Hy is julle hoop op die heerlikheid."  Kolossense 1:26-27 (NAV)

Hier keer Paulus weer terug na die "hoop" van die evangelie waarvan hy gepraat het in vers 5 van hierdie hoofstuk, maar nou gaan hy dieper en wys vir ons dat die "hoop" nie net iets objektief is nie.  Dit is die definitiewe en persoonlike inwoning van die verrese Christus in elke gelowige. Halleluja! 

Dít is die volheid van die geheimenis.  Die geheimenis is dus nie net die pre-eminensie van Christus (1:15-20) en dat Hy die volledige vervulling van al die profesieë en beloftes van die Ou Testament is nie, maar ook die verstommende waarheid dat hierdie pre-eminente Christus nou woon in elke ware gelowige. Het jy al 'n openbaring gekry van hierdie onbeskryflike waarheid wat die essensie is van die evangelie?  

SOUT EN LIG VIR 'N WÊRELD IN DUISTERNIS EN VOL KORRUPSIE

 "Julle is die sout van die aarde..."   Mattheüs 5:13a

"Julle is die lig van die wêreld."  Mattheüs 5:14a

Dit is verstommend dat Jesus vroeg in sy bediening al vir sy dissipels sê dat hulle die "sout van die aarde" en die "lig van die wêreld" is.

Hierdie dinge het Jesus nie vir sy dissipels gesê omdat hulle beter mense was as al die ander nie, maar juis omdat hulle deur Jesus te volg erken het dat hulle verlore was en dat Hy alleen hulle geregtigheid en hoop was.

In Johannes 8 vers 12 sê Jesus "Ek is die lig van die wêreld".  In onsself het ons geen lig nie en as ons probeer lewe uit ons eie geregtigheid sal ons nooit sout of lig vir enigiemand kan wees nie (Rom. 10:2-4).  Christus in ons is die sout en die lig wat hierdie wêreld so nodig het.

Dit is nie godsdienstige mense wat dink hulle is beter as ander wat die lig vir die wêreld kan bring nie, maar mense wat weet dat hulle niks in hulself het wat enige ander mens werklik kan help nie.  Slegs mense wat 'n onwrikbare geloof in die meriete van Jesus se verlossingswerk en sý karakter en persoon het, kan sout en lig wees. 

Wanneer gaan ons wegdraai van ons self-gerigte vormgodsdiens en besef dat net Christus in ons die antwoord vir die wêreld is.  Dit is nie ons wilskrag, werke, kerke, programme of projekte wat die verskil sal maak nie, maar Jesus alleen. 

Wanneer ons swak is in onsself is Hy in en deur ons die krag tot redding vir ander (2 Kor. 12:9-10).  Wanneer ons niks is in onsself nie kan Hy alles in ons wees; d.w.s sout en lig vir 'n wêreld in duisternis en vol korrupsie.