I.K. TOETS

Wat beskou die Bybel as “slim”?  Spreuke 3:5 sê:  “Vertrou volkome op  die Here en moenie op jou eie insigte staat maak nie.”  God vereis eerstens ‘n erkenning van ons eie onvermoë om te verstaan.  

In 1 Kor. 8:2 verras Paulus ons:  “As iemand meen dat hy enige kennis het, weet hy nog niks soos ‘n mens behoort te weet nie.” 

As ons besef ons is totaal afhanklik van die openbaring wat God alleen gee deur Sy Woord en Gees, is ons waarlik wys. Kom ons bely voor God die areas waar ons op ons eie insig gesteun het en dat ons afhanklik is van die insig wat slegs Hy kan gee.

DIE GEVAARLIKSTE LEEFRUIMTE OP AARDE

“En Ek sal julle ‘n nuwe hart gee en ‘n nuwe gees in jul binneste gee; en Ek sal die hart van klip uit julle vlees wegneem en julle ‘n hart van vlees gee.  En Ek sal my Gees in jul binneste gee en sal maak dat julle in my insettinge wandel en my verordeninge onderhou en doen.”  Eseg. 36:26-27 

Die belofte van die Nuwe Verbond het alles te doen met ‘n nuwe hart.   Uit die hart vloei “die oorspronge van die lewe” (Spr. 4:23).  Daarom is die wedergeboorte onontbeerlik en godsdiens sonder ‘n nuwe hart nie net dwaas en geheel en al nutteloos nie, maar sekerlik die gevaarlikste leefruimte op aarde.  Hoekom?   Want dit is moontlik vir ons om met al ons godsdiens rites en rituele totaal mislei te wees en onsself te verbeel dat godsdiensbeoefening en allerhande godsdienstige aktiwiteite God vreeslik beïndruk en outomaties Sy guns waarborg.  Die Bybel leer egter duidelik dat God slegs beïndruk is met dit wat Hyself inisieër en onderhou in en deur Sy geliefde Seun (Rom. 11:36).  Daarom is gemeentes, groepe, en bedieninge waar persoonlike bekering, wedergeboorte, en die nuwe lewe in Christus nie verkondig en konstant beklemtoon word as die basis van alles wat ons doen nie, gevaarlike plekke.  Daar vind ons gewoonlik groot getalle mense “wat ‘n gedaante van godsaligheid het, maar die krag daarvan verloën het” (2 Tim. 3:5).  Wat dit so gevaarlik maak is dat hierdie mense gewoonlik salig onbewus is daarvan dat hulle heeltemal verlore is en ‘n ewigheid sonder God tegemoet gaan.  Dan liewer ‘n opperste wêreldling wat bewus is van sy behoefte aan redding.  Mag God ons ‘n las gee vir verlore godsdienstige mense en ‘n dringendheid in ons gees om reguit te praat oor wedergeboorte.  Om ons op te hou met allerhande godsdienspraatjies as dit nie gebaseer is op die nuwe lewe in Christus nie, is dwaas en gevaarlik.

“Jesus antwoord en sê vir hom: Voorwaar, voorwaar Ek sê vir jou, as iemand nie weer gebore word nie, kan hy die koninkryk van God nie sien nie.” Jn. 3:3

“En dié van die Fariseërs wat by Hom was, het dit gehoor en vir Hom gesê: Is ons dan ook blind?  Jesus antwoord hulle: As julle blind was, sou julle geen sonde hê nie; maar nou sê julle: Ons sien! Daarom bly julle sonde.”  Jn. 9:40-41  

GLORIOUS RELEASE FROM MAN-MADE SYSTEMS OF RELIGION

“When he has brought out all his own, he goes before them, and the sheep follow him, for they know his voice.”  Jn. 10:4

The day a true disciple realises that he has already received everything in Christ that he will ever need in this life or the next, is the day everything changes.  Henceforth no manipulation or intimidation can keep you chained to man-made religious systems.  No threat or bribe can hold you back anymore.  No guilt trip or condemnation aimed at your heart by unenlightened religious people can henceforth keep you cloistered within the confines of an ambitious leadership's individualistic vision and agenda.  No humanistic sweet-talk or clever psychological mind-game can fool you or persuade you to compromise anymore.  No amount of religious bullying can scare you sufficiently to lure you back under man’s oppressive yoke.  From that day forward you follow Jesus alone in the freedom of the children of God, to serve Him with other disciples who only want to be under His yoke.  The vision and agenda of Jesus Himself is now your only passion.  This is a passion you share with other disciples who have seen the all-sufficiency of Jesus, in loving submission to one another under the Headship of Christ (Eph. 5:20-21).

"For freedom Christ has set us free; stand firm therefore, and do not submit again to a yoke of slavery."  Gal. 5:1

"Nevertheless, many even of the authorities believed in him, but for fear of the Pharisees they did not confess it, so that they would not be put out of the synagogue;  for they loved the glory that comes from man more than the glory that comes from God."   Jn. 12:42-43

"For my yoke is easy, and my burden is light."  Mt. 11:30

DIE HEERLIKE VERLOSSING UIT MENSLIKE GODSDIENS-SISTEME

"En wanneer hy sy eie skape uitgebring het, loop hy voor hulle uit; en die skape volg hom, omdat hulle sy stem ken."  Jn. 10:4

Die dag wat 'n ware dissipel werklik sien dat hy reeds alles in Jesus ontvang het wat hy ooit sal nodig hê vir hierdie lewe en die volgende, verander alles.  Geen manipulasie of intimidasie kan jou dan geketting hou aan menslike godsdiens-sisteme nie.   Geen dreigement of omkoopgeskenk kan jou meer terughou nie.   Geen skuld of veroordeling van godsdienstige mense kan jou meer gekluister hou in die klooster van ‘n ambisieuse leierskap se individualistiese visie en agenda nie.  Geen humanistiese gepaaiery of slim truuks van die sielkunde kan jou flous of oortuig om te kompromitteer nie.  Jy volg Jesus alleen voortaan in die vryheid van die kinders van God, om Hóm te dien saam met ander dissipels wat net onder Sý juk wil staan.  Jésus se visie en agenda is nou jou een passie.  ‘n Passie wat jy deel met ander dissipels in liefdevolle onderdanigheid aan mekaar onder die heerskappy van Jesus (Efes. 5:20-21).

"STAAN dan vas in die vryheid waarmee Christus ons vrygemaak het, en laat julle nie weer onder die juk van diensbaarheid bring nie."  Gal. 5:1

"Maar tog het selfs baie van die owerstes in Hom geglo; maar ter wille van die Fariseërs het hulle dit nie bely nie, om nie uit die sinagoge geban te word nie. Want hulle het die eer van die mense meer liefgehad as die eer van God."  Jn. 12:42-43

"Want my juk is sag en my las is lig."  Mt. 11:30

OM TE SIEN SOOS GOD SIEN

“As julle dan saam met Christus opgewek is, soek die dinge daarbo waar Christus is en aan die regterhand van God sit.  Bedink die dinge wat daarbo is, nie wat op die aarde is nie.” Kolossense 3:1-2

Kan dit werklik wees dat God van ons verwag om na alles in ons lewens te kyk vanuit ‘n hemelse perspektief?  Hoe kan mense wat in tyd en ruimte leef op planeet aarde en wat in ‘n bepaalde kultuur en verwysingsraamwerk geskool en gevorm is God se eie verwysingsraamwerk begryp en dan dááruit begin leef?  Dit is net moontlik op grond van die wedergeboorte waardeur die lewe van God in ons gees geplant word en die daaropvolgende nuwe begrip van die Bybel wat volgens Jesus “gees en lewe" is (Jn. 6:63). 

Vir mense wat nie wedergebore is nie bly die Bybel egter ‘n geslote boek en ‘n onverklaarbare raaisel, want “die natuurlike mens neem die dinge van die Gees van God nie aan nie; want dit is vir hom dwaasheid, en hy kan dit nie verstaan nie, omdat dit geestelik beoordeel word” (1 Kor. 2:14).  Ware dissipels het egter die lewe van Jesus binne-in hulle en het daarom “die sin van Christus” (1 Kor. 2:16).  Daarom kry dissipels van Jesus die opdrag in Romeine 12 vers 2 “en word nie aan hierdie wêreld gelykvormig nie, maar word verander deur die vernuwing van julle gemoed [by the renewal of your mind], sodat julle kan beproef wat die goeie en welgevallige en volmaakte wil van God is.” 

Ons moet dus groei in hierdie geestelike begrip wat ons met die wedergeboorte as ‘n geskenk ontvang het.  Omhels God se perspektief en tree dan dienooreenkomstig op met totale oorgawe aan God se wil soos wat die Heilige Gees jou lei.  Dit sal ook beteken dat baie van die moeilike situasies in ons lewens heetemal anders begin lyk in die lig van die hemelse perspektief en dat hierdie perspektief dalk 'n gehoorsaamheid eis wat ons sal verstom.  Moet net nie weer terugval in die aardse perspektief nie.  Bly getrou en gehoorsaam, stap vir stap, aan die innerlike leiding van die Gees soos wat Hy jou oë meer en meer begin oopmaak om te sien soos wat God sien.

GOD MAAK DIE GODDELOSE REGVERDIG

“Wanneer mense ’n werk verrig, word hulle loon nie as ’n guns beskou nie, maar as vergoeding. Die saak staan heeltemal anders met daardie mense wat geen prestasie het waarop hulle kan staatmaak nie, maar wat glo in Hom wat die goddeloses vryspreek – hulle word vrygespreek deurdat hulle glo.” Rom. 4:4-5 (NLV)

“Maar aan hom wat werk, word die loon nie na guns toegereken nie, maar na verdienste;  aan hom egter wat nie werk nie, maar glo in Hom wat die goddelose regverdig, word sy geloof tot geregtigheid gereken.” Rom. 4:4-5 (OAV)

Abraham, die vader van ons geloof, het geglo dat God die goddelose (hyself!) regverdig maak sonder enige verdienste “en dit is hom tot geregtigheid gereken” (Rom. 4:3).  God skenk slegs Sy geregtigheid in Christus aan diegene wat erken dat hulle geen geregtigheid in hulleself het nie.

Wanneer dissipels van Jesus hulle greep op hierdie waarheid verloor het dit die volgende gevolge:

-           ons raak geestelik hoogmoedig

-           ons raak Fariseërs wat geweldig bewus is van ons andersheid in plaas daarvan om te besef dat ons deur genade gered is en nie omdat ons anders of beter is as ander mense nie

-           ons het nie meer ‘n diepe waardering en dankbaarheid vir ons redding nie

-           ons verstaan of waardeer nie die kosbare boodskap van Christus wat in ons leef nie, want ons het ongemerk begin om ons eie regverdigheid te bevorder

Wanneer ons egter gedurig hierdie waarheid voor oë hou het dit tot gevolg dat ons:

-           lewe vanuit ‘n onuitspreeklike dankbaarheid dat die Here ons onverdienstelik geregverdig het

-           kan lewe in ware nederigheid en nie die ‘eiesinnige godsdiens en nederigheid’ wat Kolossense 2:23 van praat nie

-           eg kan wees en eerlik met onsself en andere, omdat ons besef dat ons almal in dieselfde bootjie is en die Here ewe nodig het

-           waarlik die lewe en vryheid van die Evangelie kan beleef en besef dat ons niks het om te verdedig nie, want ons hele geloof en hoop is in “die God wat die goddelose regverdig maak”.  Ons kan dus onbevange leef.

“AMPER-DISSIPELS”

Is dit moontlik om soos ‘n dissipel van Jesus te lyk, maar nie werklik een te wees nie?  Jesus het in Joh. 8:31 gesê:  “As julle in my woord bly, is julle waarlik my dissipels.”  Ware dissipels het ‘n aptyt vir die Woord van Christus en op grond van die wedergeboorte ‘n innerlike begeerte om dit te gehoorsaam.  Ons het onlangs op ‘n plaas by McGregor gekuier en daar het die boer drie hanslammertjies gehad.  Ons was gelukkig om te sien hoe honger en dringend hulle hul melk leeggesuig het.  Dit het ons herinner aan 1 Petrus 2:2 wat sê “verlang sterk soos pasgebore kindertjies na die onvervalste melk van die woord, dat julle daardeur kan opgroei.”

Daarom het bedienaars van die Woord die verantwoordelikheid om dissipels te voed met die Woord.  In ons bediening aan ander is dit uiters belangrik om te waak daarteen om gewildheid vir onsself te probeer werf deur sielkundige boodskappe te preek wat die ore streel of stories en praktiese lesse sonder ‘n leerstellige inhoud, motiveringsboodskappe sonder die krag van God d.m.v. die evangelie, ensovoorts.  Predikers kom dikwels vandag in versoeking om agter die massas aan te gaan en die “amper-dissipel” gelukkig te hou in plaas van om ware dissipels te voed met die Woord.  Hierdie benadering maak dit haas onmoontlik vir ware dissipels om volwassenheid in Christus te bereik (Efes. 4:11-16).   Soos iemand gesê het “in plaas van om die skape te voed, vermaak ons die bokke”. 

Verder is dit ononderhandelbaar dat die Evangelie in gemeentes duidelik en sonder kompromie verkondig word met ‘n appèl op bekering en wedergeboorte, sodat “amper-dissipels” ware dissipels kan word.

“En Ek sal aan julle gee herders na my hart, wat julle sal oppas met kennis en verstand.” Jer. 3:15